265. De Excidio Hierosolymorum.

1. Plange, Sion et ludaea,
Plangant, quotquot sunt in ea,
Quod triumphat Idumaea,
Et Aegyptus fert tropaea;
Amalech invaluit,
Ierusalem corruit,
Loca sancta polluit
Proles Cananaea.

2. Infidelis gens et rea
Servos Christi ut Medea
Istos vendit in plataea,
Illos truncat sub romphea;
Probitas evanuit,
Nostra virtus aruit,
Arcam Dei rapuit
Procax Philistaea.

3. Plebs pagana debacchatur,
Nomen Christi blasphematur,
Rachel tristis lamentatur,
Eam nemo consolatur ;
Christianus populus
Mactatur ut vitulus,
Senex, virgo, parvulus
Ut hos immolatur.

4. Alathia superatur

Et a pseusti decalvatur,
Aurum Christi conculcatur,
Nomen Dei detestatur;

Pendet in patibulo

Iesus sine titulo,

Ab ignavo populo
Item sauciatur.

5. Evanescit in tormentis
Multitudo nostrae gentis,
Iacet absque vestimentis,
Manus abest miserentis ;
Exclamant: Attendite,
Qui tansitis, sistite,
Miseros inspicite
In excessu mentis.

6. Lingua Christum confitentis
Nunc truncatur persequentis,
Ecce, plaga pro pulmentis
Et pro pane stridor dentis ;
Mundi reges, currite,
Captivos redimite
Et caput conterite
Christum conterentis.

7. Rex Aegypti, male legis
Flores campi summi regis,
In despectu nostrae legis
Nostri necas oves gregis ;
Surge, rector superum,
Fabricator siderum,
Audi preces pauperum,
Rex, qui cuncta regis.

8. Pie Deus, cesset ira,
Verberasti, iam aspira,
Si sit manus adhuc dira,
Quis narrabit Christi mira?
Interfectis fratribus,
Captivatis ducibus
Pendet in salicibus
Organum cum lyra.

9. Peccatorum pro offensis
Telo cadit Aconensis,
Regis pedes et littensis
In compedibus sunt densis ;
Impii carnifices
Sunt iniqui iudices,
In sacros pontifices
Debacchatur ensis.

10. Militibus comprehensis
Capitur urbs Peritensis,
Miles, cliens et burgensis
Absconduntur in condensis ;

Destructa sic Syria

Suscepit Sicilia

In misericordia
Lacrimas Tharsensis.