266. Tbreni captis Hierosolymis.

Indue cilicium, sedeas in pulvere, mater
Orba, replens orbem fletibus ecclesia,
Die vae, die vae, vae, nec enim tibi talis ab Evae
Est data temporibus materies gemitus.
5. Filia Ierusalem, lamentum sume super te,
Te cecidisse gemas, virgo decora Sion.
Pangite, perculsi rectores ecclesiarum,

Lugubris hoc famae vos meruisse malum ;
Clerus, plebs, monachi, nuptae, viduae, moniales,
10. Flete gravem Domini vos tetigisse manum.

Ecce, locus, templum, domus, atria, terra redemptrix,

Incola turba cadit gentibus exposita.
Terra salutari cruce, corpore, sede sepulcri,
Montis Oliveti dote beata fuit;
15. Plena sacramentis, signis, fidei documentis
Gente sub ignota sunt temerata loca.
Humanum si iudicium, rex Christe, subires,

Causari de te plurima posset homo:
Miror, ait, cur dotatam tibi sanguine terram
20. Caede profanarit barbara nequities,

Teque sinente manum validam princeps tenebrarum

Miserit in sanctos, qui tibi lux fuerant,
Hos feriendo dolis, alios circumveniendo
Et misero mortis illaqueando metu.
25. Fertur enim fidei prolapsum vulgus ab arce
Te repulisse Deum, conciliasse deos.
Extentas vidisse manus in deditionem

Est dolor, est miserum plasma perire tuum.
Ecce, decus ligni, nostrae quo viva salutis
30. Hostia pendebas, barbarus hostis habet ;
Depopulata iacet structura monasteriorum,

Clerus ubi, monachus, virgo sacrata fuit.
Quid iuga tantorum memorem decursa laborum?
Nocte dieque tuae vim patiuntur oves.
35. Cladibus his quem quando dabis, Iesu bone, finem,
Cum pius exsistas vel potius pietas?
Tene preces et amara tuae suspiria sponsae

Ad pietatis opem flectere posse negas?
Ipse iubes tibi vota dari, tua dona precari,
40. Totus opem mundus flagitat, et refugis?

Haec modo non audis, sed et orbi viscera claudis?
Hinc stupor, inde dolor, hinc pudor, inde timor.
Id solum resonat, Babylon rex cuncta subegit,
Opprimit Israel dextera Salathiel.

45. His ita respondet ratio, Deas in ratione:
"Haud dubie nosti corde, fidelis homo,
Quanta Deus tulerit gratis pro te redimendo

Seque patri pretium morte sua dederit.
Quas super his grates, quae laudis munia solves?
50. Munere pro grandi grandia debueras.

Sed cum praeter te nihil exquirat Deus a te,
Est breve mandatum: Dilige, salvas eris."
Nunc secus in terris agitur, respersa venenis
Nequitiac est mundi lata superficies.
55. Viribus, arte, minis, incestu, caede, rapinis
Turpia moliri sunt benefacta viri.
Laudatur, qui nunc fraudes, periuria, furta

Dictat, amat, peragit pectore, voce, manu.
Die, ubi ius, ubi fas, ubi lex, ubi foedera pacis?
60. Esse malum decus est, dedecus esse bonum.
Ordo monasticus, ecclesiasticas ordinis expers

Mundo non Christo militat ore, manu.

Talibus, heu, studiis hominum quod vita rotatur,

Nos pater in virga visitat, ut revocet.

65. Utens ergo malis in opus pietatis et usum

Cepit ab arce Sion nec ratione vacat.

Terra etenim nostrae consummativa salutis

Morbi communis debuit esse parens,
Ut, quibus commune malis instare, sit ipsis
70. Et commune pati compatiendo bonis.
Constantinopoleos Romanave moenia capta

Sive cremata parem nunc parerent gemitum.
Ergo solum natale suum, loca sancta profanis
Tradita praedari seque secundo pati
75. Maluit in membris, ut amore Dei redimentis
Viscera cunctorum compatiantur eis.
At, pia si vel nuda vel est obscura voluntas,

Luce vacans operis, luce caret meriti;
Luceat ergo foris interni robur amoris,
80. Splendeat officium, prodeat in medium.
Evigilate, viri, consurgite, state virili

Pectore pro Domino proque ruente domo!.
Unde salutis opem mundo fluxisse videmus,
Unde suas vires sumpsit habetque fides,
85. Primus et in primis veniat caput urbis et orbis,
Praesul apostolicus consiliis, precibus,
Non armis pugnando quidem sed in arma citando,

Hortatu, monitis eliciendo viros.
Orbis et imperii decus augustum, Fridericus,
90. Lux, via, dux plebis emicat e tenebris,

Armis, ingenio, titulo virtutis, honore

Inclitus, excelsus, clavus, ubique potens,
Vita placens cuius nostris servata diebus

Muneris e caelo creditur esse genus.
95. Ipse facultatum redditus fabricasque domorum

Schemate regali contulit imperio.
Maiestatis apex, claris diuturna triumphis,

Praelia concludens lassus hebet senio,
Iamque fatiscentis sunt membra fovenda quiete,
100. Militis haec ratio postulat emeriti.

Res miranda, senex Christi iuvenescit amore

Tam re quam signis ora ferens aquilae,
Non sibi, non partis opibus natisvc paratus

Parcere, sed laetum carpere mortis iter.
105. Hic vir, hic hostiles numeroso milite fines

Instrans innocui sanguinis ultor erit.
Quo duce prudenti populum spes tanta sequetur,

Partis ut adversae colla subacta putet.
Signifer ipse Dei cum stabit in arce tropaei,
110. Luminis aetherei porta patebit ei.

Quae poterit vox, Christe, tuas recitare cohortes,

Reges, pontifices, cum ducibus comites?
Robusti cordis iuvenes, a finibus orbis

Ite, ferite reos, nil metuatis eos!
115. Im[me]mores aetatis, opum, thalami subolisque

Ite, subito, crucem restituendo crucem.
Spes veniae fructus vitae, diadema perenne

Reddunt totius suave laboris onus.
Felix militia, cui donativa rependet
120. Verax sermo Dei; laus, honor, hymnus ei.

• "

Obsecro lectorem, cum legerit haec mea, dicat:
Carminis auctorem Deus Erbonem benedicat.