268. Thronus Salomonis.

1. Thronum grandem ebore

Salomon construxit
Aurumque purissimum

super hoc induxit,
Opus illi simile

mundo non illuxit,
Libro regum tertio

rumor hic effluxit.

2. Salomon pacificus

hic interpretatur,
Per quem Dei filius

vere designatur,
Nam per eum gentibus

pax in terris datur,
In excelsis gloria

Deo cum cantatur.

3. Throni retro summitas

se curvat in gyrum;
Ne quis homo reputet

sermonem delirum,
Audiat et videat,

quod inclinat, mirum,
Nam matrem significat,

quae nescivit virum.

4. Per ebur intellege

donum castitatis,
Elephas nam continet

vim frigiditatis,
Auri notat puritas

ignem caritatis,
Regem pacis decuit

thronus iste satis.

5. Opus huic consimile
Deus non creavit,
Cuius verbum Gabriel
quando nuntiavit,

Vox per aurem virginis

uterum intravit,
Sic in isto solio

Dominus regnavit

6. Quid per manus geminas

caeli notat diva,
Ni quod vita duplici

fuit ipsa viva?
In amore proximi

nam vixit activa,
In mandatis Domini

semper contemplativa.

7. Leones a latere

quam habent naturam?
Duplicis custodiae

gerunt hi figuram ;
Nam Ioseph ferrarius

matris egit curam,
Deinde discipulus

post crucis torturam.

8. Per gradus intellege

sex ascensionis
Proximi sex opera

miserationis,
Istis quia sedula

virgo fluit bonis,
Thronus esse meruit

veri Salomonis.

9. Bis seni leunculi

supra gradus stantes
Totidem apostolos

sunt repraesentantes,
Pacem terrae finibus

evangelizantes,
Regem huius saeculi

Christum praedicantes.

10. Huius throni summitas

quod signum intendit?
Ecce, sanctum spiritum,

qui dudum ascendit
In beatam virginem

et lumen accendit,
Per quod hanc ab impetu

saeculi defendit.
11. Summitatis edocet

forma artis talis,
Quod sit idem spiritus

almus aeternalis
Aeterno in circulo,

nam initialis
Non apparet terminus

sic neque finalis.

12. Finis in principio

rei non videtur,
Sed cum invisilibis

Deus adfirmetur,
Et cum Deus spiritas

idem adprobetur,
Sic throni per occiput

spiritus notetur.
13. Hoc de caelo genitor

emittat spiramen,
Sua quoque gratia

sacram assit flamen,
Cum filio genetrix

nobis det iuvamen
Per gradus ad solium

claritatis. Amen.