ARTICULUS IV. De opere secundae diei.

Deinde, Quaeritur de his quae facta sunt secunda die.

Et quia de firmamento et aquis et distinctione aquarum jam supra habitum est, tantum duo restant quaerenda, scilicet, Qualiter Deus vocavit firmamentum coelum ? et, Quare secunda dies non habuit benedictionem ?

Non enim ponitur ibi verbum significans actum benedictionis, sicut in aliis, quibusdam, ubi dixit: Benedixit eis. Nec etiam ponitur ibi verbum notans approbationem, sicut, Vidit Deus quod esset bonum.

Item juxta hoc quaeritur, Qualiter in quibusdam notatur benedictio in verbo approbationis tali modo loquendi : Vidit Deus quod esset bonum, sicut in operibus quatuor primorum dierum, et in aliis notatur per verbum benedicendi, sicut, benedixit eis.

Solutio. Ad primum dicendum, quod omne nomen imponitur a forma : et quando Deus firmamento formam dedit substantialem, tunc ipso opere coelum vocavit.

Ad aliud dicendum quod opus secundae diei dependet ab opere tertiae diei.

Distinguebatur enim secunda dies natura elementorum, quae disponitur diaphano ab uno extremo quod est diaphanum naturaliter conjunctum lumini, ut coelum crystallinum : et non est sufficiens distinctio nisi eadem elementa diaphana etiam alio extremo distinguantur, quod naturaliter est opacum, et hoc fit tertio die quando aquae distinguuntur a terra. Et quia tunc distinctio perfecta est, tunc accepit benedictionem per notam approbationis divinae.

Si autem quaeritur secundum hoc, Quare intercidit secundus dies ante opus perfectum ? Quia una perfectio operis videtur pertinere ad unum diem.

Dicendum, quod distinctio mediorum elementorum ab utroque extremo, scilicet a coelo et a terra, non est unius rationis. A coelo enim distinguuntur elementa, quae sunt receptibilia luminis, sicut ab eo cum quo non communicant in materia, sed sunt mobilia ab ipso tantum. Sed a terra distinguuntur sicut ab eo eum quo communicant in materia agentia in ipsum et patientia ab ipso. Et dico tria elementa esse media inter coelum et terram : quia communicant cum utroque extremorum. Cum coelo enim habent diaphanum, ut dicit Philosophus in II de Anima : cum terra autem communicant tantum in materia.

Ad ultimum dicendum, quod quaedam agunt et patiuntur in. generatione a principio intrinseco quod est natura : et agere et pati illorum est sub necessitate : et ideo non oportet, quod fiat eis imperium ad appetitum actus generationis, sed tantum benedictio eorum notatur in nota approbationis divinae, quod sic permaneant in natura, quemadmodum constituta sunt, et talia sunt opera primorum quatuor dierum : licet enim vegetabilia habeant animam, haec tamen anima magis movet ut natura quam ut anima : quia motus eorum sunt sub necessitate

et sunt determinati ad unum et non ad contraria. Quaedam autem moventur a principio intrinseco, quod est anima sensibilis vel rationalis habens appetitum hujus et contrarii, et illa non de necessitate generant, sed inclinatione appetitus : et ideo alii distinguunt imperio inclinante appetitum per naturam in generatione, quod designatur per talem modum benedictionis : Crescite , et multiplicamini .