272. Laudes Studii Scholaris.

1. Nemo valet congruis

verbis explicare,
Quam sit honorabile

studium scholare,
Quod videtur inclitos

viros procreare,
Qui solent ecclesiam

Christi gubernare.

2. Schola primum docuit

papam, cardinales,
Schola saepe barbaros

facit curiales,
Ad honores provehit

agrestes et rurales
Et pagenses efficit

gnaros et legales.

3. Otium scholasticum

est negotiosum,
Tale namque otium

non est otiosum,
Nam dat suo servulo

munus speciosum
Quem facit industrium

et ingeniosum.

4. Septem artes liberales

nullus unquam scivit,
Nec donum sapientiae

quisquam acquisivit,
Qui non scholae limina

primitus attrivit
Et suos didascalos

fideliter audivit.

5. Qui iuvenis fideliter

ad scholas properavit
Et suam pronus ferulae

cervicem subiugavit,
Hunc fortuna saepius

ad ardua levavit
Et variis honoribus

digne decoravit.

6. Multi, quos inglorii

parentes genuere,
Quia tamen fervide

in scholis studuere,
Cernuntur in sedibus

altis residere
Et honoris titulis

splendide fulgere.

7. Canonici, presbyteri,

praepositi, primates,
Clerici, diaconi,

priores et abbates
Deo primum et post hoc

scholae ferte grates,
Quae vos fecit habiles

ad hos dignitates.

8. Cum tot schola soleat

viros parturire,
Qui solent ecclesiam

Christi redimire,
Quis tam corde vacuas

et tam mentis dirae
Coetum hunc scholasticum

poterit odire?

9. Coetus iste clauditur

saeptis sive muris,
Nec vagari sinitur

ad amoena ruris,
Sed ibi corripitur

flagris saepe duris.
Tantis laeta congruit

immiscere curis.

10. Solet namque studium

scholasticum gravare
Hunc qui modum congruum

nescit observare,
Quare ludis placidis

decet inhiare
Atque suo tempore

solaciis vacare.

11. Hic est dies iubili,

quem tempore longaevo
Statuit antiquitas,

ut a iugo saevo
Relaxentur paululum

et a virgae naevo;
Salve, festa dies

toto venerabilis aevo.

12. Cum vos sitis itaque

in statu dignitatis,
Clara vos praeconia

consequi sciatis ;
Si in arta clausula

diu fatigatis,
Emicet aerarium

vestrae largitatis.