ARTICULUS X. De quiete sabbati.

Postea, Quaeritur de quiete sabbati.

1. Si enim quiescere est ab operibus cessare, videtur falsum quod dicit: Requievit Deus die septimo , cum dicat in Joanne, v, 17 : Pater meus usque modo operatur, et ego operor. Si vero quiescere est opus finale facere, tunc aliquid operatus est die sabbati Deus, et sic non complevit opera in numero sex dierum.

2. Praeterea, Artificis lassabitis quiescere est post opus : et cum Deus non possit lassari, videtur quod male dicitur de eo, quod quievit ab opere suo.

3. Praeterea quaeritur, Quare dicit : Ab opere, et non in opere ?

4. Item, Quare dicit: Et sanctificavit illum ?

Solutio. Dicendum, quod quiescere est ab opere cessare duobus modis, scilicet ex parte operis, et ex parte efficientis. Ex parte operis : quia postea nihil novum fecit, cujus principia naturalia secundum formam vel materiam vel similitudinem in sex diebus non praecesserunt. Ex parte efficientis vero : quia in sex diebus naturam in principiis suis Deus per seipsum instituit. Post vero non per seipsum solus, sed cum natura : et in natura res naturales propagavit : et de hac propagatione intelligitur quod dicitur in Joanne, v, 17.

Ad aliud dicendum, quod quies in hac significatione non est lassati, sed artificis qui usque ad perfectionem deduxit opera.

Ad aliud dicendum, quod ab notat remotionem quiescentis ab opere, non enim quievit Deus in operibus suis, ut in optimo beneplaciti sui, sed. in seipso.

Ad aliud dicendum, quod sanctificare sabbatum est sanctam quietem Dei demonstrare, ut scilicet homo libros legens discat in Deo quiescere per appetitum et dilectionem : et non opera Dei pro Deo diligere, sicut faciunt hi qui fruuntur creaturis.

Sed horum amplior ratio habebitur in tractatu de praeceptis.

VOLUMEN TRIGESIMUM QUINTUM