276. De Fraude Mulierum.

1. Dicat nobis primus homo,
Qui deceptus est in pomo:
Sum eiectus Dei domo ;

2. Uxor mea me fraudavit,
Paradiso me privavit,
Quando pomum praesentavit.

3. Dic tu, Loth dilecte, verum,
Quanta fraus sit mulierum.
Heu, deceptus sum per merum ;

4. Me delusit nata mea,
Nam induxit fraudis rea
Commisceri me cum ea.

5. Dic tu, Samson, et fatere,
Quid sentis de muliere?
Sum per eam lapsus vere;

6. Tonsis pilis defraudatus,
Sum per hostes excaecatus,
Aede fractus et necatus.

7. Numquid David, rex propheta,
Castitate rupit spreta
Leges Dei et decreta?

8. Patet teste Salomone:
Mulieres raro bonae
Plenaeque deceptione.

9. Mulierum contra tela
Sume fugam pro medela,
Tutior non est [cautela].

10. Heu, pro certo scio verum,
Mille fraudes mulierum,
Sumo testem totum clerum.

11. Mulieres sunt loquaces,
De natura sunt nugaces,
Sed de more sunt fallaces.