ARTICULUS II.

Utrum intellectus possibilis sit simplex vel compositus ?

Secundo quaeritur, Utrum intellectus possibilis sit simplex vel compositus ? Et videtur, quod compositus. 1. Omne enim quod est ex additione, est compositum : intellectus possibilis est ex additione : ergo est compositus. Veritas primae patet per se, et per simplicis diffinitionem ; simplex est, cui non est pars aliqua. Secunda probatur ex hoc, quia ista duo nomina, intellectus et possibilis, non dicunt idem, sed duas naturas conjunctas intellectui possibili.

2. Item, Saeptus probatum, est supra, quod nihil est susceptibile formae accidentalis nisi, prius susceperit formam substantialem : sed intellectus possibilis suscipit formas accidentales, ut scientias : ergo prius habuit formam substantialem : et sic iterum redit, quod ipse est compositus, Sed contra :

Dicit Aristoteles quod tria sunt principia transmutationis et motus, scilicet materia, forma, et privatio. Et secundum hoc oporiet, quod potentia materiae nihil ponat aliud a privatione materiae : et quia privatio non. facil compositionem cum materia, ideo remanet materia simplex. Ergo a simili potentia intellectus possibilis non dicet aliquid aliud, a privatione et essentia ipsius intellectus : cum igitur privatio non inducat compositionem aliquam, remanebit quod intellectus sit possibilis et simplex.

Solutio, Dicimus intellectum possibilem esse simplicem.

Ad primum autem dicendum, quod potentia non ponit nisi naturam intellectus, quia ipse susceptibilis est intelligibilium : et haec natura non est aliud ab ipso. Sicut enim materia per seipsam susceptibilis est formarum, ita intellectus possibilis per seipsum est susceptibilis intelligibilium : et sic idem est dictum per possibile, et per intellectum, sed sub alia ratione, quae tamen ratio nihil addit, eo quod est ratio privationis.

Ad aliud dicendum, quod anima intellectiva composita est : sed pars ejus quae est intellectus possibilis, non est composita : sicut etiam compositum ex materia et forma, partes suae essentiae non habet compositas, scilicet materiam et formam : aliter enim esset abire in infinitum.