ET QUAESITUM TERTIUM.

Quid sit notitia, mens, et amor ?

Tertio quaeritur, Quid sit notitia, mens, et amor, quam secundam imaginem appellat Augustinus ?

Mens enim in se est continens memoriam, intelligentiam, et voluntatem : ergo videtur, quod non debeat attribui Patri, sed toti Trinitati.

Praeterea quaeritur, Tn quo differunt haec tria a praehabitis tribus?

Et dicunt quidam, quod praehabita supponunt potentias, ista vero habitus illarum potentiarum.

Sed contra hoc est,

1. Quod dicit Augustinus in libro XV de Trinitate , quod tria cum sint distincta a se invicem, tamen dicuntur esse unum : quia in anima substantialiter existunt. Habitus autem non substantialiter existit in anima. Ergo haec tria non sunt habitus.

2. Item, Dicit Augustinus , quod mens cum se cognoscit, notitiam sui gignit, et est sola parens suae notitiae. " Tertius est amor, qui de ipsa mente et notitia procedit, dum mens cognoscit se et diligit se : ita amor quidam complexus est parentis et prolis. " Ex hoc accipitur, quod mens sit intellectus : quia illius est cognoscere se.

3. Praeterea, Non videtur universaliter verum, quod existente notitia procedat amor : quia multa cognoscimus quae non amamus.

4. Item, Nosse est mentis, ut habitum est prius ex verbis Augustini : et nosse est memoriae : ergo mens est memoria: sed cujuscumque est nosse, illius est notitia : ergo notitia est memoriae : ergo videtur, quod mens hic supponitur pro memoria et non pro intellectu.

5. Item, In memoria sensibilis animae tamquam in thesauro reservantur notitiae phantasiae et intentiones aestimativae : et notitiae phantasiae sunt per modum veri et falsi, intentiones vero aestimativae per modum boni et mali: ergo similiter erit in memoria rationalis animae, quod in ipsa est notitia intelligentiae, et amor voluntatis, et ita ista Iria sunt in memoria.

Sed tunc quaeritur, Quae sit ratio, cum mens sit commune ad tria, quare potius coarctatur ad memoriam quam ad reliqua duo ?

Praeterea, Dicit Augustinus : " Nec minor est proles parente, d uni tantam se novit mens quanta est : nec minor est amor parente et prole, dum tantum se diligit mens, quantum se novit et quanta est . " Hoc enim videtur manifeste falsum. In multis enim amor nullo modo respondet notitiae.

Solutio, Dicendum, quod ista trinitas est in habitibus, ut dicunt Magistri : et mens supponit ibi memoriam cum suo habitu : notitia vero dicit habitum intellectus, qui idem est cum habitu memoriae in substantia, sed differt in ratione, quae non est nisi relatio ad intellectum : amor vero est habitus voluntatis.

Ad primum ergo dicendum, quod mens aequivoce dicitur de superiori parte animae et de memoria. Memoria vero par-

ticipat nomen mentis : eo quod ipsa propinquior est naturae totius per hoc quod prima est inter potentias quae sunt partes mentis. Et ideo dicit Augustinus , quod mens ibi non dicitur anima, sed id quod est in anima excellentius : hoc enim est memoria.

Ad aliud dicendum, quod notitia et amor accipiuntur materialiter pro noto et amato : et haec substantialiter existunt in mente : quia idem est notum et amatum quod substantialiter est mens, licet differant in ratione.

Ad aliud dicendum, quod mens non supponit intelligentiam : cognoscere enim secundum quod hic accipitur, gignitur a mente sicut intelligentia a memoria : et propter hoc licet cognoscere sit intelligere, non tamen sequitur, quod mens sit idem quod intelligentia.

Ad aliud dicendum, quod dictum Augustini non extenditur ad omnem notitiam, sed tantum ad illam .qua mens novit se et Deum secundum habitus insertos sibi a natura ; et iliam notitiam semper sequitur amor naturalis. Et hoc est quod dicit Augustinus in toto libro de Trinitate, quod verbum quod insinuare intendimus, est cum amore : notitia vero simpliciter.

Et per hoc patet solutio ad totum.