ARTICULUS III.

Quae sint contenta in caelo Trinitatis ?

Tertio quaeritur, Quae sunt contenta in caelo Trinitatis ?

Et videtur, quod Angeli continentur in ipso,

1. Dicit enim Beda, quod intra Deum currunt quocumque mittantur. Constat autem, quod hoc nomen, Deus, secundum quod hujusmodi non importat rationem continentiae : importat autem caelum Trinitatis : ergo videtur, quod Angeli sunt in Deo secundum quod ipse est coelum Trinitatis.

2. Item, Locus est salvativus et contentivus locati : salvationem autem et continentiam Angeli non habent ab aliquo corpore, neque a spiritu creato, sed a spiritu increato, et non secundum quod est spiritus increatus : quia sic non importat rationem continentiae : ergo erunt in ipso secundum quod ipse est caelum.

Sed contra :

Lucifer per hoc quod voluit conscendere in caelum Trinitatis, voluit esse aequalis Deo : ergo esse in. coelo Trinitatis est esse aequalem Deo : et nullus Angelus potest esse aequalis Deo : ergo nullus Angelus potest esse in caelo Trinitatis.

Juxta hoc quaeritur, Utrum beata Virgo sit esse in caelo Trinitatis ?

Videtur, quod sic : quia dicitur, quod exaltata sit super choros Angelorum ad caelestia regna : et nihil est super choros Angelorum nisi caelum Trinitatis : ergo ipsa est in caelo Trinitatis.

Juxta hoc item quaeritur, Utrum Christus secundum quod homo sit in caelo Trinitatis ?

Videtur, quod sic.

i. Ita dicitur in symbolo : " Ascendit ad caelos, sedet ad dexteram Patris. " Dextera autem Dei Patris est in caelo Trinitatis.

Item, In Actibus, VI, 56, dicit Stephanus : Ecce video caelos apertos, et Filium hominis stantem a dextris Dei.

Item, In Psalmo XVIII, 7 et 8 : A summo caelo egressio ejus, et occursus ejus usque ad summum ejus. Occursus autem ille fuit filii hominis.

2. Item, Super illud Joannis, xvii, i : Pater, venit hora, clarifica Filium tuum, dicit Glossa Hilarii : " Petit quod caro " fiat apud Patrem, quemadmodum Fi" lius fuit apud. Patrem : " sed Filius fuit ab aeterno in caelo Trinitatis, et in omnibus exauditus est pro sua reverentia, ut dicit Apostolus : ergo caro exaltata est in caelo Trinitatis.

3. Item, I ad Corinthios, xv, 26 et seq.,

sic arguit Apostolus : Omnia subjecisti sub pedibus ejus : in eo quod subjecit ei omnia, nihil dimisit non subjectum ei. Et respondet postea, quod ipse Filius subjectus est ei qui subjecit ei omnia : Filius autem secundum divinam naturam. non est subjectus Patri, sed aequalis : ergo ille cui subjecit omnia, est homo in quantum homo : ergo caelum empyreum cum omnibus contentis suis erit sub ipso : et non potest esse sub ipso nisi ipse sit altior : ergo ipse esse in caelo Trinitatis. Contra : Esse in caelo Trinitatis est esse in aequalitate Dei, ut dicunt Sancti. Christus homo in quantum homo non est in aequalitate Dei Patris, cum dicat : Pater major me est . Ergo Christus homo in quantum homo non est in caelo Trinitatis.

Solutio. Dicimus, quod nihil est in caelo Trinitatis nisi Pater et Filius et Spiritus sanctus : quia esse in coelo Trinitatis est esse in aequalitate virtutis Dei continentis et salvantis omnia sub ipsa virtute contenta.

Ad primum ergo quod objicitur, quod Angeli intra Deum currunt, dicendum quod hoc est intelligendum quantum ad praesentiam contemplationis proportionabilis : quia superiores plus, inferiores minus contemplantur : et non sequitur si. sunt in Deo, et Deus est caelum Trinitatis, quod sint in caelo Trinitatis : et est ibi fallacia accidentis propter diversam rationem Dei et caeli Trinitatis.

Ad aliud dicendum, quod Deus continet et salvat ut principium efficiens, non relinquens id quod efficit per praesentiam essentiae et potentiae, secundum quem modum Deus est in omnibus creatis. Et si hoc modo dicatur Deus locus Angelorum, sicut videtur dicere Beda: non tamen erit locus proprius commensuratus locato per aequalitatem : quod importat caelum Trinitatis.

Ad id quod objicitur de beata Virgine A dicendum quod ipsa non est in caelo Trinitatis : et quod dicitur : Exaltata est super choros Angelorum, hoc est dignitate, sicut patet in quaestione de Ascensione.

Ad id quod objicitur de Christo secun dum quod homo, dicendum quod ipse secundum quod homo non est in caelo Trinitatis : tamen ipse homo est in caelo Trinitatis.

Quod autem dicitur in symbolo, dicitur de persona in duabus naturis, et illa bene est in caelo Trinitatis.

Similiter intelligendum est illud de Actibus, et illud de Psalmo.

Ad id quod objicitur de Hilario, dicendum quod caro dicitur ibi Christus homo, et Christus homo in persona est in aequalitate Patris.

Ad hoc quod objicitur de ratione Apostoli, dicendum quod ipse loquitur de Christo homine in quantum homo cui subjiciuntur omnia dignitate et non loco : diffinitive enim corpus Christi et Christus homo in quantum homo continetur in caelo empyreo : sacramentaliter autem continetur in altari : dignitate non continetur ab aliquo loco, sed est super omnem locum, et super omnia quae diffinitive et circumscriptive continentur in loco.