PARTICULA 1.

De visione matutina .

Ad primum proceditur sic :

Dicitur enim sic matutina visio in prima luce, sive in Verbo.

Sed tunc quaeritur, Utrum quaelibet visio in Verbo vel in prima luce dicatur visio matutina?

1. Si enim sic, tunc Prophetae etiam viderent visione matutina, et rapti et beati in patria.

2. Secundum hoc etiam, cum secundum Augustinum in prima die creationis viderunt in Verbo Angeli, prima dies haberet visionem matutinam, et prima dies haberet mane, quod est contra Genesim et Augustinum.

3. Praeterea, Cum dicitur in Genesi, Fiat , secundum Augustinum importatur visio matutina. Ergo videtur, quod visio matutina non dicatur quaelibet visio Verbi vel Dei, sed illa quae ponit aliquid futurum quod statim erit in opere : quia hoc importatur per hoc verbum, Fiat : et sic videtur, quod quotiescumque aliquis Angelus cognosceret aliquid futurorum in Deo, videret visione matutina : et hoc est falsum, cum dicatur in Job de primis creatis. Ubi eras..., cum me laudarent simul astra matutina, et jubilarent omnes filii Dei ? Videtur, quod astra matutina laudaverunt eum de visione matutina, etiam quando nihil futurum in eo accipiebant.

4. Praeterea, Dicit Augustinus in libro Ii super Genesim ad litteram : " Non sicut mos ad percipiendam sapientiam proficiebant Angeli, ut invisibilia Dei per ea quae facta sunt, intellecta, conspicerent, qui ex quo creati sunt, ipsa Verbi aeternitate sancta et pia contemplatione perfruuntur : atque inde ista despicientes secundum id quod intus vident, vel recte facta approbant, vel peccata improbant . " Ex hoc videtur, quod videre visione matutina, est perfrui contemplatione, et in inferioribus discernere bona a malis : et sic rapti et Prophetae videntur videre visione matutina, sicut supra objectum est.

5. Item, Augustinus in libro III ejusdem : " In caeteris creaturis praeter Angelos dicitur, et sic factum est, ubi significatur in illa luce, hoc est, intellectuali creatura, prius facti Verbi cognitio : ac deinde cum dicitur, Fecit Deus , ipsius creaturae genus demonstratur, quod Verbo Dei dictum erat ut fieret . " Ex hoc videtur, quod non sit visio matutina videre aliquid in Verbo.

6. Item, Augustinus in libro IV ejusdem : " Mane est, cum a cognitione creaturae in laudem creatoris assurgitur " Ex hoc videtur, quod visio matutina est visio rei. factae, et ex illa laudare creatorem.

Solutio. Secundum Augustinum visio matutina importat duo, scilicet conversionem in creatorem ex creatura facta per contemplationem laudum et jubilationum, et perceptionem in ipso creaturae faciendae. Et quoad primum dicit Augustinus, quod visione matutina informatur creatura intellectualis ex hoc quod ad formantem Deum convertitur : et ideo etiam prima dies non legitur habere mano : quia in prima die factum est coelum, quod beatus Augustinus angelicam naturam interpretatur : quae etiam non cognovit se prius fiendam, ut postea ex se facta ad laudem creatoris converteretur, sed tantum cognovit se factam, et ex se facta conversa in Deum, cognitionem accepit alterius creaturae faciendae : et hoc est mane sequentis diei: sicut enim in luce corporea mane est prima illustratio eorum quae sunt apud nos, ita in origine mundi prima manifestatio creaturae in luce intellectuali dicitur inane : prima autem manifestatio creaturae est manifestatio ejus in ratione prima antequam sit : et haec ratio in Verbo est, in quo secundum Augustinum sunt rationes omnium.

Ad id ergo quod primo objicitur, dicendum quod non quaelibet visio in Verbo dicitur matutina visio, sed illa quae habet duo quae praedicta sunt.

Ex hoc etiam patet solutio ad secundum, quare prima dies non habet mane.

Ad tertium dicendum, quod illa est visio matutina quae ponit aliquid futurum ad institutionem naturae per opus creationis et dispositionis et ornatus: illa enim opera solius Dei sunt, et tantum ad primam perfectionem mundi pertinentia.

Ad quartum dicendum, quod Augustinus intendit probare, quod Angeli a principio creationis viderunt Deum, et visio eorum incipit a Deo, et descendit in creaturas, e contrario visioni nostrae quae incipit a creaturis et ascendit in Deum. Et ex hoc vult inferre, quod necesse sit Angelos habere visionem matutinam de primis creatis : sed non in-

tendit per hoc distinguere visionem matutinam a vespertina.

Ad aliud dicendum, quod Verbum contemplatur duobus modis, scilicet secundum substantiam, et secundum quod in se continet rationes operum creationis : et hoc ultimo accipitur in auctoritate Augustini. Etiam sic Dionysius in libro de Divinis nominibus dicit, quod ratio vel verbum Deus laudatur a sanctis eloquiis, non tantum quoniam et rationis et mentis et sapientiae est largitor, sed. etiam quoniam omnium causas in seipso uniformiter praeaccepit.

Ad ultimum patet solutio per ea quae in principio solutionis dicta sunt.

ARTICULI TERTII