ARTICULUS I.

Quid discernat personas Angelorum ?

Ad primum proceditur sic :

i. Dicit Richardus de sancto Victore in libro de Trinitate, quod " personae distinguuntur tribus modis, scilicet origine

tantum, et proprietate tantum, et utroque. Origine tantum, sicut in Deo : proprietate tantum, sicut in Angelis : utroque, sicut in homine. " Sed videtur, quod hoc sit falsum : quaecumque tantum sola proprietate differunt, illa sunt indifferentia secundum substantiam : ergo si Angeli distinguuntur sola proprietate, ipsorum substantia erit una : quod falsum est : quod probatur per hoc, quod proprietas est de genere accidentium, ut dicit Boetius.

2. Praeterea, Videtur quod distinguuntur origine : quia dicitur in libro Ducis neutrorum, quod in separatis a materia non est numerus nisi per causam et causatum tantum : sed Angeli sunt separati a materia : ergo si differunt numero, hoc erit secundum rationem causae et causati : sed ratio causae et causati est ratio originis : ergo distinguuntur origine.

3. Praeterea, Dicit Boetius in libro de Duabus naturis in una persona Christi, quod persona est rationalis naturae individua substantia, : individuum autem est (sicut dicit Porphyrius) collectione accidentium quae non possunt in alio inveniri, et haec sunt patria, parentela, locus, et hujusmodi, quae non conveniunt Angelis : ergo videtur, quod non sunt individuae substantiae : et per consequens non erunt personae.

Contra : Persona est hypostasis rationalis naturae per se : quilibet Angelorum est hypostatis rationalis naturae per se una : ergo est persona : ergo convenit eis discretio personalis.

Solutio. Dicimus, quod accidit Angelis discretio personalis, et est unum attributorum, et bene concedimus, quod discernuntur proprietatibus personae angelicae. Et ad hoc intelligendum, notandum, quod quoddam facit personam, et aliquid ostendit eam esse discretam. Hoc autem facit personam, quod facit eam esse per se unam. : nihil autem facit eam per se unam nisi particulatio formae super hanc materiam. Cum igitur in Angelis sit esse et quod est, esse distinctum super quod est, facit Angelum per se unum esse in angelica natura : et sic facit eam esse per se unam. Individuantia autem ostendunt personam distinctam esse, et in materialibus quidem materialiter sunt individuantia, in intellectualibus spiritualiter. Et si quaeratur, Quae sunt illa in Angelis? Dicatur, quod a tribus sumuntur, scilicet a distinctione operationum, officiorum, et praemiorum : haec enim in Angelis sunt distincta, et quod invenitur in uno, non invenitur in alio : et haec vocat proprietates.

Dicendum igitur ad primum, quod quando dicitur, quod sola proprietate distinguuntur personae in Angelis, intelligitur de discretione qua cognoscitur persona, et non de illa qua constituitur. Nos enim substantias angelicas cognoscimus esse distinctas per discretionem operum, officiorum, et praemiorum.

Ad aliud dicendum, quod in libro Ducis neutrorum, cap. de uno Deo, separata dicuntur omnino simplicia, et haec simplicia non distinguuntur proprietatibus absolutis : quia proprietas quae absoluta est in uno, est et in altero.

Sed secundum hunc numerum et discretionem quae non causatur nisi a relatione causae et causati, et principii et principiati, et taliter simplicia non sunt Angeli, ut patet ex praedictis in primo attributo.

Ad tertium dicendum, quod individuantia non sunt materialiter in Angelis, sed spiritualiter, sicut diximus superius.