ARTICULUS I.

Quid sit Seraphim ?

Deinde de Seraphim quaeritur, Quid sit?

1. Et sumatur ratio Dionysii qui dicit sic in libro de Coelesti hierarchia , quod " sancta Seraphim nominatio dicit incendentes aut calefacientes. " Sed cum Seraphim prima conversio sit in Deum secundum accipere, videtur quod potius dici debent incensi vel calefacti, quam incendentes vel calefacientes.

2. Item, Cum sit conversio in Deum secundum acceptionem i11uminationum, magis deberent denominari a lumine, quam ab ardore.

3. Item, Cum duae sint proprietates ignis, scilicet illuminativa, et ustiva, et unam illarum communem habeat cum coelo, scilicet illuminativam, illa videtur esse nobilior : igitur ab illa nobilior ordo potius deberet denominari.

4. Item, Cum quaedam proprietas ignis sit secundum, siccitatem quae sequitur caliditatem, quaeritur, Utrum aliquid simile secundum spiritualia insit Seraphim?

5. Praeterea quaeritur, Quae sit diversitas inter incendere et calefacere? quae duo dicuntur manifestari per nomen.

Solutio, Dicendum, quod unusquisque ordo (ut dicit beatus Gregorius ) illius doni censetur nomine, quod plenius acceperit in munere : ita tamen, quod superiores omnia dona inferiorum habeant eminenter, et inferiores superiorum non eminenter: et hoc infra explanabitur.

Seraphim igitur ab ardore charitatis Seraphim sunt appellata: quia, sicut dicit beatus Bernardus in sermone 19 super Cantica: ((Seraphim ipsa charitas Deus in se adeo traxit et absorbuit, atque in eumdem rapuit sanctae affectionis ardorem, ut unus cum Deo spiritus esse videantur : instar profecto ignis qui aerem quem inflammat, dum suum ei totum calorem imprimit, induitque colorem, non ignitum sed ignem fecisse cernitur. Amant itaque praecipue contemplari in Deo Cherubim quidem scientiam cujus non est numerus,. Seraphim vero charitatem quae numquam excidit. "

Ad primum ergo dicendum, quod incensivum et calefactivum dicunt plenitudinem sufficientiae charitatis, sed non plenitudinem copiae quam habent non ignitam, sed ignis. Unde ut notetur, quod ex abundantia charitatis copiose etiam aliis possunt infundere, potius dicuntur calefacientes, quam calefacti aut incensi.

Ad aliud dicendum, quod duobus modis considerantur istae duae proprietates, luminosum, et calidum, scilicet in se, et in ordine ad vitam quam faciunt. Et in se luminosum dignius est quam calidum proximum est vitae : lumen enim per calorem operatur vitam in naturalibus, et similiter in spiritualibus. Vita igitur gloriae et vita gratiae secundum complementum gratiae sunt in calore affectionis secundum charitatem, et secundum minus perfectum in luce intelligentiae.

Et per hoc patet solutio ad sequens.

Ad aliud dicendum, quod calor vitalis est secundum igneum caelum, et ille calor secundum Philosophos sic mirificus potius est in humido quam in sicco : et sic dicimus de ardore Seraphim, quod pascitur et nutritur humido pietatis et devotionis.

AD aliud dicendum, quod non est idem calefacere et incendere : omnia enim quae incenduntur, calefiunt, et non convertitur: et sic Seraphim superiores quidem spiritus inferiores tamen se totos incendunt tamquam ardori charitatis magis aptos : inferiores autem ad differentiam istorum dicuntur calefacientes, ad modum ignis qui vicina sibi incendit et ignit, remota autem calefacit tantum.