ARTICULUS II.

De proprietatibus Thronorum .

Secundo, Quaeritur de proprietatibus Thronorum, quas tangit Dionysius in libro de Coelesti hierarchia, sic : " Ipsa altissimarum et compactarum sedium nominatio docet omni diligenter exaltari ab ignominia subjectionis, et ad summum supermundane sursum ferens, et ab omni extremitate ineffabiliter in sublimissimum et circa vere excelsum totis viribus immutabiliter et stabiliter collocatum, et divini superadventus in omni impassibilitate et immaterialitate acceptivum, et deiferum, et familiariter in divinas susceptiones apertum. "

1. Quaeritur ergo primo, Quomodo sedes illae dicantur compactae, cum compingi proprie sit materialium?

2. Item, Quid dicatur ignominia subjectionis a qua exaltantur? Si enim est vilitas conditionis vel potentiae, hoc videtur convenire omnibus Angelis quod exaltantur ab illa.

3. Item, Ad summum sursum ferre potius videtur convenire altissimo ordini, scilicet Seraphim, quam Thronis.

4. Praeterea quaeritur, Quid dicatur extremitas ? o. Item, Penes quid proprietates sumantur ?

6. Item, Cum Thronus ponatur regi ei judici et magistro, quaeritur quare non

assignavit diversas proprietates penes illa?

Solutio. Dicendum ad penultimum, quod sex proprietates assignatae a Dionysio omnes accipiuntur a proprietatibus throni regalis : illi enim convenit collocari in alto, et ordinari, et semper paratum esse ad susceptionem sessionis regis, sicut patet in auctoritate Bernardi supra inducta. Unde tres istarum proprietatum pertinent ad. collocationem Thronorum, et tres ad susceptionem sessionis regalis. Tres autem quae pertinent ad collocationem primae, et duae respiciunt terminum a quo removetur quando collocatur in alto : una vero respicit terminum circa quem collocatur in alto. Thronus enim regis primo quidem removetur a scabellari ignominia servorum, cui in spiritualibus respondet exaltatio ab his qui intendunt in infima materiae et mutationis. Et haec est illa quam vocat, Omnium diligenter exaltari ab ignominia subjectionis. Et secundum commentum dicitur ibi ignominia progressus tendens ad infima,

Et per hoc patet solutio ad secundum.

Alia vero respicit terminum qui dicitur extremitas, sicut thronus regis non exaltatur tantum super scabella servorum, sed super sedes potentum et principum, cui respondet in spiritualibus exaltatio super eos qui quiescunt quidem illuminationibus divinis, sed non recipiunt eas in sede prima, sed quasi in sede secunda, sicut inferiores Angeli et homines qui non accipiunt immedate a Deo : et haec est proprietas tertia tacta a Dionysio, cui conveniunt quinque, scilicet quod locantur vere circa vere excelsum ineffabiliter in sublimissimum totis viribus incommutabiliter et stabiliter. Et dicitur ineffabiliter quantum ad immen-

sitatem divinae beatitudinis in qua collocantur. In sublimissimum autem dicitur quantum ad modum recipiendi illuminationes ab ipso Deo immediate et locari in illis. Totis autem viribus in quantum concurrunt omnes virtutes ad hoc quod sit locus Dei, scilicet intellectus et affectus, etc. Incommutabiliter propter confirmationem liberi arbitrii. Stabiliter autem profer invariabilitatem gratiae. Et haec quinque etiam sunt in throno regis materialiter. Thronus enim ille ineffabilis est quantum ad amplitudinem imperii et potestatis: et secundum habitudinem dignitatis et loci est in sublimissimum. Quantum autem ad fulcimenta principum concurrunt virtutes in ipso : et tunc exigitur incommutabilitas eorum super quos sedet, et stabilitas ex parte sua. Tertia vero proprietas accipitur penes id circa quod collocatur in alto: et haec est proprietas secundo tacta a Dionysio, scilicet ad summum supermundane sursum ferens : et licet haec conveniat Seraphim, tamen haec non manifestat nomen ejus sicut nomen Thronorum, nec est dignissima proprietas ejus.

Et per hoc patet solutio ad tria objecta.

Aliae tres proprietates sunt susceptionis sessionis Dei: qui modi aut sunt in aptitudine sellae ad sedentem : et sic est proprietas sexta, quae est familiariter in divinas susceptiones apertum. Aut sunt in ipsa sessione: et sic est proprietas quarta, quae est divini superadventus in omni impassibilitate et immaterialitateacceptivum. Et dicit in omni immaterialitate: quia cum materia multipliciter inspiciatur, est uno modo materia quasi locus formae : et ideo dicit Isidorus, quod eadem esset determinatio potentiae in materia et loco : fulcitur enim esse formae per materiam: et ne sic intelligatur in divinis, quod Throni fulciant Deum, dicit in omni immaterialitate. Similiter secundam Philosophum , anima secundum potentias passivas et apprehensivas dicitur locus specierum cognoscibilium. Ne igitur credatur, quod Throni sic respiciant Deum per speciem, et non immediate per substantiam, dicit in omni impassibilitate. Tertio autem modo possunt considerari modi sessionis secundum actum sequentem susceptionem sedentis in sella, et ille actus sequens est ferri in Thronis : et sic est proprietas quinta, quae est deiferum.

Et sic patet solutio ad. objecta praeter primum et ultimum.

Dicendum ergo ad. primum, quod compacta dicitur sedes propter consolidationem intellectus et voluntatis et liberi arbitrii in confirmatione, ad hoc quod per tranquillitatem sit locus Dei.

Ad ultImum dicendum, quod thronus proprie pertinet ad regem, tribunal vero ad judicem, cathedra ad magistrum. Et si thronus dicitur magistri vel judicis, hoc erit per adaptationem, sicut loquitur beatus Bernardus. Sed beatus Dionysius considerat thronum proprie,in quantum proprie regis est.