ARTICULUS II. De proprietatibus Potestatum .

Secundo, Quaeritur de proprietatibus Potestatum, quas ponit Dionysius in libro de Coelesti hierarchia, sic dicens: " Ipsam sanctarum Potestatum aequi potentem divinarum Dominationum et Virtutum nominationem aestimo declarare bene ornatam et inconfusam circa divinas susceptiones ordinationem, et ordinatum supermundanae et intellectualis potestatis non tyrannice in ea quae inferiora sunt potestativis Virtutibus praecipitatae, sed potenter in divina post bene ordinatas reductae, et post eam deiformiter reducentis, et ad potentificam causalem potentiam quantum fas est assimilatae, et eam ut possibile Angelis revelantis in bene ordinatis per ipsam. ordinibus potestativa virtutem . "

1. Quaeritur autem de hoc quod dicit, aequipotentem divinarum Dominationum et Virtutum. Si enim Potestates sint sub Dominationibus et Virtutibus, non videntur esse aequipotentes.

2. Item, De hoc quod dicit in proprietate prima, Potestates dicunt ordinationem bene ordinatam et inconfusam circa divinas susceptiones. Hoc enim commune videtur esse omni ordini, et non proprium isti.

3. Praeterea, Nihil videtur esse hoc quod dicit, Ordinationem bene ornatam

et inconfusam : quia per ordinationem videtur inconfusio.

4. Praeterea quaeritur, Per quid ordinatur potestas Potestatum? omnis enim ordo est secundum aliquam lationem ordinantem.

5. Item, Quaeritur de hoc quod dicit potestatem esse manifestationem intellectualis potestatis. Non enim videtur esse intellectualis potestas quando arcet malignitates hominum.

6. Item, De hoc quod dicit esse Potestatis, non tyrannicae praecipitatae potestativis virtutibus in ea quae inferiora sunt. Hoc enim idem videtur assignasse supra Dominationibus, ubi dixit: " Nullaque tyrannicarum dissimilitudinum ullo modo universaliter inclinatam. "

7. Item, Objicitur de hoc quod dicit in quarta proprietate, quod nomen Potestatum manifestativum est potestatis reductae potenter in divina. Quia non videtur consequi ad ordinationem potestatis, sed potius e converso : quia ex hoc potestas ordinata est, quod in divina reducta est.

8. Praeterea, Quaeritur de ultima in qua dicit, quod nomen Potestatum est potestatis revelantis eam, scilicet potestatem, ut possibile Angelis, id est, quantum possunt Angeli existentes in ordinibus bene ordinatis per ipsam, scilicet potestatem, ordinatis dico Potestatum virtute, id est, virtute pertinente ad potestatem.

Solutio. Dicendum, quod Dionysius principaliter intendit Potestatem penes ordinationem potestatis. Haec autem ordinatio fit. per leges aeternas, secundum quas propelluntur nociva, et juvantur bona. Sicut enim in potestatibus humanis sunt leges humanae, secundum quas dirigitur gladius potestatis ad confirmationem reipublicae: ita in divinis sunt leges aeternae, secundum quas ordinatur coercitio Potestatum, qua repellunt injurias. Et secundum differentias illius ordinationis multiplicantur proprietates in accipiendo vel in communicando illuminationes huic ordini proportionatas.

Si enim considerentur in accipiendo illumi?a?iones, hoc fit sex modis, seundum quod sex proprietates enumerat. In potestate enim tria sunt, scilicet substantia potestatis, et virtus, et actus. Substantia autem est duplex, scilicet forma, et id quod est potestas. Penes formam autem accipitur proprietas, quae est, Bene ornatam et inconfusam, etc. : et dicitur, Inconfusam, propter ordinationem legum aeternarum, quibus ordinantur ordinata. Aut dicitur secundum comparationem ad metas : quia proprios limites non excedit. Ornatam autem dicit propter scientiam et gratiam acceptam per illuminationes : et hoc innuit dicendo in eadem proprietate, Ordinationem circa divinas susceptiones. Penes autem id quod est potestas, id est, penes hoc quod supponit et importat quantum ad habitum, accipitur proprietas secunda, quae est, Ordinatum supermundanae et intellectualis potestatis : ordinatum enim tangit formam generalem potestatis quae contrahit supermundanae : quia ordinatio fit per leges supermundanas, ut supra dictum est. Intellectualis autem potestatis dicit esse potestatis in proprio subjecto, sicut omnis proprietas per subjectum habet determinari.

Si autem penes virtutes accipitur potestas, tunc erit proprietas ultima quae est, Eam ut possibile Angelis revelantis in bene ordinatis, etc. Cujus intentio in objectione exposita est. Et quod dicit, Ordinibus, non intelligitur de ordinibus qui sunt partes hierarchiae, sed de ordinibus illuminationum descendentium et ornantium virtute potestativa eumdem ordinem secundum possibilitatem cujuscumque Angeli existentis in illo ordine.

Si vero consideretur penes actum, hoc erit tripliciter, scilicet aut penes comparationem actus ad objectum in quod agit: et sic est proprietas tertia, quae est, Non tyrannice in ea quae inferiora sunt potestativis virtutibus praecipitatae.

Et differt iste actus ab actu Dominationum : quia Dominationis est coercere subditum, secundum quod est subditus, non tyrannice, vel remisse: sed Potestatis est coercere injuriosum et malum judicando, non tyrannice ut inimicus naturae, nec remisse, sed ut judex qui est ad vindictam malefactorum, laudem vero bonorum. Aut penes actum comparatum adfinem qui finis est reduci in divina, in eo quod participat potestatem Dei: et sic est proprietas quarta, quae est, Potenter in divina post bene ordinatas potestates reductae. Aut penes id quod consequitur ex aclu comparato ad objectum et finem, et hoc est assimilatio ad primam causam potestatis, et penes hoc accipitur penultima, quae est, Ad potentificam causalem potentiam quantum fas est assimilatae.

Et per hoc patet solutio ad totum.