ARTICULUS 1.

Quid sint Principatus ?

Ad primum proceditur sic :

Dicit Gregorius : " Principatus vocantur qui ipsis quoque bonis Angelorum spiritibus praesunt, qui subjectis aliis dum quae sunt agenda disponunt, eis ad explenda divina ministeria principantur . "

Et videtur falsum quod dicit, quod bonis Angelorum spiritibus praesunt. Quia Dionysius dicit, quod infima hierarchia convertitur super humanam sic : " Principatuum et Archangelorum et Angelorum manifestativam dispositionem et humanis hierarchiis per consequentia praesidere, supple, arbitrandum est . "

Praeterea, Hoc videtur esse contra Bernardum in libro V de Consideratione ad Eugenium : " Putemus Principatus quorum moderamine et sapientia omnis in terris principatus constituitur, regitur, limitatur, transfertur, mutilatur. " Hoc idem videtur haberi in Daniele : Princeps regni Persarum restitit mihi viginti et ano diebus : et ecce Michael, unus de principibus primis, venit in adjutorium meum . Et in Deuteronomio : Statuit terminos populorum juxta numerum Angelorum Dei , secundum aliquam translationem, quod exponit Dionysius de Principatibus, juxta quorum dispositionem disponuntur in terris principatus.

Item, Bernardus in sermone 19 super Cantica : " Sunt Principatus, qui Deum altius speculantes, et liquido praevidentes universitatis principium esse, et primogenitum omnis creaturae, tanta proinde dignitate principatus donantur, ut ubique terrarum habeant potestatem, quasi de summo quodam rerum cardine regna et principatus et quaslibet pro arbitrio mutare et ordinare dignitates, pro quorumque meritis facere primos novissimos, et novissimos primos : deponere potentes de sede, et exaltare humiles. "

Contra omnia haec videtur esse quod dicit Bernardus in summa praedicti, sermonis, sic : " A Principatibus Deus diligitur ob aeternam et originalem illam virtutem, quae esse et essendi principium omni creaturae superiori et inferiori, spirituali et corporali, attingens a fine usque ad finem fortiter. " Ex hoc videtur, quod Principatuum sit converti in Deum secundum quod ipse est, creator rerum et non secundum dispositionem principatuum terrenorum : quod est contra Gregorium dicentem, quod sunt nonnulli, qui acceptis virtutibus etiam electorum hominum merita transcendunt : cumque bonis meliores sint, electis quoque fratribus principantur. Quo ergo isti sedem suam nisi inter Principatuum numeros accipiunt ?

Solutio. Dicendum, quod Principes dicuntur Angeli accipientes illuminationes et potestatem ad dispositiones principatuum terrenorum. Id autem quod dicit Gregorius, non intelligitur, quod actus hierarchiarum proprius sit super Angelos converti : sed quia in postrema hierarchia ordo altior est ordine, ideo dicit, quod Angelis principantur.

Ad auctoritatem autem Bernardi dicendum, quod intelligit hoc de eo quod consequitur ex actu Principatuum secundum conversionem in Deum : ex hoc enim quod sic ordinat principatus hominum, mirantur esse principem et principium creaturarum, attingentem ubique ordinando et transmutando creaturas et res.