ARTICULUS II.

De proprietatibus Principatuum .

Secundo, Quaeritur de proprietatibus Principatuum, quas enumerat Dionysius in libro de Caelesti hierarchia, dicens : " Manifestat enim ipsa quidem caelestium Principatuum . nominatio, illud quidem deiformiter principale eductivum cum ordine sacro et principalibus et decentissimis virtutibus, et ad

superprincipale principium eas, scilicet coelestes essentias, universaliter converti, et alias hierarchice ducere ad illud ipsum, quantum possibile formari, princificum principium, manifestareque superessentialem ejus ordinationem ornatumque principalium virtutum . "

1. Quaeritur ergo de hoc quod dicitur, Deiformiter principale,Hoc enim videtur esse primae hierarchiae, et non postremae.

2. Praeterea, Ductivum cum ordine sacro et principalibus et decentissimis virtutibus, videtur convenire Virtutibus et non Principatibus.

3. Item, Non videtur proprium esse ad superprincipale principium converti, sed. potius ad mediam hierarchiam, a qua accipiunt illuminationes.

4. Praeterea, Quod dicit, quod alias hierarchice ducunt, non videtur convenire illis de postrema hierarchia, quae tantum ducuntur, et non ducunt.

Solutio. Dicimus, quod quaedam istarum proprietatum accipiuntur penes accipere illuminationem, et quaedam penes communicare.

Et penes communicare quidem accipitur quarta, quae est, Et alias hierarchice ducere ad illud ipsum, quantum possibile formari, princificum principium. Postrema enim hierarchia ducit humanam, et unus ordo alium, quantum potest formari principio primo, quod dicitur princificum : quia omne principium et omnem principatum facit et constituit.

Penes suscipere autem illuminationem est triplex consideratio, scilicet ad substantiam principatus, et ad actum, et ad effectum consequentem. Quoad substantiam est prima proprietas, quae est, Principium illud deiformiter principale manifestare. Et dicitur principium ibi a principatu, et non a prioritate illuminationum : quia sic (ut dictum est) prima manifestatio illuminationum est in pri- ma hierarchia, secunda in secunda, etc. Et dicitur deiformiter ad differentiam constitutionis principatus humani. Penes actum autem est duplex operatio, scilicet penes suscipere illuminationem : et sic accipitur proprietas tertia, quae est, Ad superprincipale principium universaliter eas converti.Et penes reducere illuminationem acceptam ad opus : et juxta hoc accipitur secunda, quae est, Ductivum cum ordine sacro et principalibus et decentissimis virtutibus. Et dicitur ductivum, quia principatum accipit ad manuductionem eorum qui in principatu sunt constituti. Virtutes autem non supponunt hic ordinem specialem : sed accipitur hic virtus (ut dicit Philosophus in VII Ethicorum ) quod virtus est optimorum operativa, licet non operetur ibi, circa delectationes et tristitias, sed circa exigentiam proprii officii. Et dicuntur illae decentes per comparationem ad honestum quod debet promovere princeps, sicut dicitur in Isaia : Princeps ea quae sunt principe digna, cogitabit . Et dicuntur principales a principatu, ut prius dictum est. Similiter cum dicitur, superprincipale principium, dicitur superprincipale quod est super principatum. Penes comparationem autem ad effectum consequentem accipitur proprietas ultima, quae est, Manifestare superessentialem ejus ordinationem ornatumque, principalium virtutum. Et dicitur ordinatio superessentialis constitutio in principatu ab essentia prima, quae est super omnes essentias. Ornatus autem dicitur ex concursu optimorum habituum ad proprium actum officii exsequendum. Principales autem virtutes accipiuntur secundum modum supra dictum. Haec enim manifestantur in quantum sunt imago principatus primi. Quod autem sunt imago primi, consequuntur ex substantia et actu principatus. Et per hoc patet solutio ad omnia.