ARTICULUS I. Quid sint Angeli ?

Ad primum proceditur sic :

Dicit Gregorius, quod " illi dicuntur

Angeli, qui minima nuntiant . " Angelorum enim vocabulum est nomen officii, ut dicit Gregorius.

Quod non videtur : quia

1. Minima nuntiare minimae hierarchiae videtur esse proprium. : sed minima hierarchia est hominum : ergo hoc erit humanae hierarchiae. Et hoc videtur dicere Gregorius sic : " Sunt plerique qui

parva capiunt, sed tamen eadem haec parva pie annuntiare fratribus non desistunt. Isti itaque in Angelorum numerum currunt. "

2. Item, Secundum Bernardum non videtur esse hoc officium Angelorum, qui dicit ad Eugentium in libro V de Consideratione : " Putemus Angelos dici eos, qui singuli singulis hominibus dati creduntur, missi in ministerium secundum Pauli doctrinam propter eos qui haereditatem capient salutis : de quibus Salvator : Angeli eorum in coelis semper vident faciem Patris mei qui in coelis est . " Ergo videtur, quod officium Angeli neque sit minima nuntiare, neque etiam custodire, sed potius abyssum judiciorum Dei effectui mancipare. Dicit enim sic Bernardus in sermone 19 super Cantica : " Angelica creatura, irrepercussa mentis acie intuetur divinorum judiciorum abyssum multam, quorum summae aequitatis ineffabili delectatione beata, gloriatur Insuper effectui ea per suum ministerium mancipari, ac palam fieri. " Si vero aliquis dicat, quod intelligit hoc de superioribus Angelis, patet quod hoc non est verum : quia ibidem continue dicit, quod diligitur ab Angelis Deus ob judiciorum suorum summam aequitatem : ab Archangelis vero ob consiliorum summam moderationem.

Solutio. Dicendum, quod secundum proprietates hierarchiae quae distinguuntur secundum descensum illuminationum, quae illuminationes descendunt per annuntiationes, primus actus Angelorum est nuntiare, consequens suadere, et custodire.

Ad hoc autem quod objicitur, dicendum quod minima dicuntur respective, et non absolute, scilicet respectu eorum quae annuntiantur per Archangelos quae sunt majora : quia illa sunt praecipue causa salutis, pertinentia ad redemptionem in signo, vel in re : signum enim exhibitum est antiquis patribus, et res nobis, sicut infra cum de custodiis Angelorum disputabitur, habet determinari.

Per hoc etiam patet solutio ejus quod objicitur de Bernardo in libro V de Consideratione ad Eugenium : quia ibi determinatur actus consequens, et non primus.

Ad id autem quod objicitur de Canticis, dicendum quod abyssus multa judiciorum est altitudo divitiarum sapientiae et scientiae Dei de his quae pertinent ad salutem singulorum, scilicet quod unus vocatur per gratiam, et alter juste reprobatur per culpam. Haec effectui mancipantur per Angelos : et haec licet minima sint respective ad Archangelos. secundum Gregorium, tamen simpliciter sunt maxima.