QUAESTIO LII.

Utrum ordines manebunt post diem judicii ?

Consequenter transeundum est ad quartum membrum superioris divisionis, quod est, Utrum ordines manebunt post diem judicii vel non ?

Videtur, quod sic.

1. In Sententiis enim dicitur, quod ordines distincti sunt secundum gradus naturae : gradus autem naturae non evacuabuntur : ergo neque ordines.

2. Item, Creatura rationalis vel est in

via, vel est in patria : sed Angeli non sunt in via : ergo in patria : nihil autem eorum quae sunt in patria, est ex parte : et nihil evacuabitur nisi quod ex parte est: ergo ordines Angelorum non evacuabuntur.

3. Item, Si unus evacuaretur, cum eadem ratio sit de omnibus, omnes evacuarentur : ergo Seraphim et Cherubim evacuarentur : quod falsum est: quia Angeli in perpetuum diligent et cognoscent.

Contra :

i. Glossa super epistolam I ad Corinth. XV, 24, dicit quod " dum durat mundus, Angeli Angelis, homines hominibus, daemones daemonibus praesunt . " Omnibus autem collectis, cessabit omnis praelatio.

2. Item, Officia Angelorum quorumdam pertinent ad quaedam opera, sicut miracula facere, arcere daemones,ordinare principatus, et hujusmodi. Horum autem usus non erit post diem judicii. Ergo videtur, quod ordines non sint perpetui.

Solutio. Dicendum, quod sicut in Scripturis innui videtur, et Dionysius dicit, omnes ordines distinguuntur penes illuminationes reducentes in Deum. Et hoc patet in visione Ezechielis , ubi apparuit similitudo Seraphim, apparuit etiam similitudo rotarum, in quibus figurabatur rota mundi currens in rota dispositionis Angelorum. Et hoc expressum est in alia visione, ubi quidam immediate sunt circa Deum : alii autem primas accipiunt ab illis, qui sunt medii : alii autem sequuntur illos, qui sunt ultimi : et super hoc fundat Dionysius tractatum suum. Unde etiam dicit , quod sic per ordinem est ad Deum ascensus : et ideo superiores et medii et inferiores easdem illuminationes accipiunt, scilicet pertinentes ad reductionem hierarchiae humanae. Et cum illa fuerit reducta post diem judicii, talis descensus illuminationum non erit : et ideo praelatio hierarchiarum quoad hoc cessabit tam in superioribus quam in inferioribus : stabit tamen in fine suo, scilicet in completa et perfecta reductione inferiorum. Similiter ordines secundum distantiam beatitudinis manebunt : quia aliter in domo Patris non essent mansiones multae.

Ad primum ergo dicendum, quod quoad illos gradus manebunt ordines, scilicet quoad actus in tali descensu illuminationis in quali modo sunt.

Ad aliud dicendum, quod natura angelica secundum statum suae beatitudinis est in patria : sed secundum suum effectum quantum ad aliquem actum est secundum conditionem viae : et ideo quoad hoc cessabit.

Ad aliud patet solutio.

Sunt tamen quidam qui dicunt quorumdam ordinum actus evacuari et non omnium : illi enim ordines qui denominantur a praelatione, sicut Dominationes et inferiores omnes cessabunt : et ideo dicit Apostolus : Cum evacuaverit omnem principatum, et potestatem, et virtutem. Illi autem qui denominantur ab actu conversionis in Deum, non cessabunt : quia sunt secundum conditionem patriae, et non viae. Sed cum secundum dicta Dionysii illuminationes mediorum quae exiguntur ad propria officia, descendant a primis, ideo si officia mediorum cessabunt in aliquo actu, oportet quod descensus illuminationum ad hos actus cessent. Et hoc praecipue videtur ex hoc (sicut supra dictum est) quod circa Dominum procedentem ad conversionem nostrae hierarchiae apparuerint et supremi et medii et inferiores, sicut patuit in visione Isaiae et Ezechielis. De hoc tamen expressius habebitur in quaestione de custodiis Angelorum.