ARTICULUS V.

Utrum semper custodiant Angeli, vel aliquando recedant a custodiendo ?

Quinto quaeritur, Utrum semper custodiant Angeli, vel aliquando recedant a custodiendo ?

Et videtur, quod recedant a custodiendo : quia

1. Dicit Bernardus in sermone 7 super Cantica, tractans illud verbum : In conspectu Angelorum psallam tibi : " Doleo proinde aliquos vestrum in sacris vigiliis gravi deprimi somno, nec coeli cives revereri, sed in praesentia principum tamquam mortuos apparere : cum vestra ipsi alacritate permoti, vestris interesse solemniis delectarentur. Vereor ne vestram desidiam quandoque abominantes cum indignatione recedant, et unusquisque vestrum incipiat sero cum gemitu dicere : Longe fecisti notos meos a me : posuerunt me abominationem sibi . Et illud, Elongasti a me amicum et proximum, etc. . "

2. Item, In Evangelio Nazaraeorum dicitur, quod malitia Judaeorum multiplicata, et imminente passione Christi auditae sunt voces Angelorum in aere dicentium : Transeamus ab his sedibus.

3. Item, Jerem. li, 9, super illud : Curavimus Babglonem, et non est sanata, dicit Glossa Augustini : " Supremi medici sunt Angeli curantes animas, quos a nobis repellimus, cum eorum consilio nolumus acquiescere. "

4. Item, Supra Ziacliariam, IV, l, dicit Augustinus : " Quotiescumque humana

fragilitas suae relinquitur imbecillitati meretur ut ab ea recedat auxilium Dei et sanctorum Angelorum. "

5. Praeterea, Talia possunt apparere signa mortis, quod medicus recedit : ergo cum Angeli sint medici animarum, talia possunt signa mortis aeternae ostendi, quod recedunt ab eis.

Sed contra :

1. Bernardus in sermone 31 super Cantica dicit : " Angelus est, qui in omni loco sedulus quidem pedissequus animae non cessat sollicitare eam, et assiduis suggestionibus monere eam, dicens : Delectare in Domino, et dabit tibi petitiones cordis tui . Et illud, Exspecta Dominum, viriliter age, et confortetur cor tuum, etc . Ad Deum autem dicit: Quemadmodum desiderat cervus ad fontes aquarum, ita desiderat anima mea ad te, Deus . " Et sequitur : " Discurrit medius inter dilectam et dilectum, vota offereris, referens dona. Excitat istam, placat illum. Interdum quoque licet raro, repraesentat eos pariter sibi sive hanc rapiens, sive illum adducens. "

2. Praeterea, De nemine desperandum est dum est in via : ergo propter quaecumque mortalia peccata fidelissimi medici animae non est reliquere animam, quamdiu manet spes vitae.

Si hoc concedatur, tunc habet locum quaestio beati Dionysii, quam movet in libro de Coelesti hierarchia, et est ista : " Cum unaquaeque gens habet Angelum sibi deputatum, quia statuit Excelsus terminos gentium juxta numerum Angelorum Dei: quomodo Hebraeorum populus reductus est solus in divinas illuminationes? an ab Angelis suis sint idololatrae relicti ? et tunc Angeli eorum videntur culpari de negligentia . "

Solutio. Dicendum, quod Angelus non recedit a custodiendo : non enim est necesse : quia simul potest custodire et frui Deo, et videre ipsum : quia, sicut dicit Gregorius , intra Deum currunt, quocumque mittantur.

Ad illud autem quod objicitur in contrarium, dicendum quod longinquitas illa non est in loco, sed in participando efficaciam custodiae : et hoc non ex desidia Angeli, sed quia custoditus per torporem et peccatum se inhabilem reddit ut effectum custodiae percipiat. Et est simile de regione dissimilitudinis, in quam longe recedit peccator a Deo, non distantia loci, sed meriti.

Ad aliud dicendum, quod ad illa semina synagogae typice Archangeli et Angeli sunt deputati populo : et ideo cum typus transivit in veritatem, et promissa in exhibitionem, synagoga in Ecclesiam, tunc etiam Angeli custodes populi Dei facti sunt custodes Ecclesiae.

Ad aliud dicendum, quod relinquere Babylonem non est intelligendum quoad effectum custodiae, sed quoad hoc quod exhibuerunt tribulationibus, ut redirent per tribulationes, qui recesserant per prosperitatem.

Ad aliud dicendum, quod recedit a nobis auxilium Dei et Angelorum per peccata quoad participationem, non ita quod non exhibeatur nobis quamdiu sumus in via.

Ad quaestionem Dionysii aptanda est solutio ejusdem : quia non habemus compulsam virtutem : unde Angeli suadent, non cogunt, et consentientes reducunt in divinas illuminationes, non consentientes autem permittunt oberrare. Quod autem aliis gentibus persuaserint, probat Dionysius ex somniis Pharaonis

et Nabuchodonosor et aliorum, quae per Angelos sunt ministrata.