PARTICULA III.

Utrum Angelis accrescat pugna et contradictio inter seipsos ?

Tertio quaeritur, Utrum eis accrescat pugna et contradictio inter seipsos ?

Et primo quaeritur de contradictione quae videtur esse inter bonos.

Secundo, de contradictione quae est boni et mali.

Ad primum proceditur sic :

1. Dicitur, Job, xxv, 2 : Potestas et terror apud eum est, qui facit concordiam in sublimibus suis. Ergo videtur, quod inter sublimes Angelos sit discordia, quae per Dominum ad concordiam reducitur.

2. Item, Videtur per Danielem, Daniel. x, 13 : Princeps autem regni Persarum resistit mihi viginti et uno diebus : et ecce Michael, unus de principibus primis , venit in adjutorium meum : et ego remansi ibi juxta regem Persarum. Ubi dicit Hieronymus : " Videtur mihi hic Angelus esse, cui Persis credita est : et isti sunt principes de quibus loquitur Paulus : ''Sapientiam loquimur inter perfectos,..., quam nemo principum hujus saeculi cognovit . " Ex hoc videtur, quod principes contradictionem habent inter se ad invicem.

3. Item, Ibidem alia Glossa super illud : Restitit mihi: " Faciens pro commissis sibi provinciis, ne captivorum populus dimitteretur. " Et forsitam cum oraret Propheta, exauditus fuit : nam statim et ei missus est Angelus, qui Dei indulgentiam nuntiaret : quia viginti et uno diebus resistit ei princeps Persarum, enumerans peccata Judaeorum, quibus iuste captivi tenerentur nec demitterentur.

4. Item, Hieronymus super illud : Cum ego egrederer, apparuit princeps Graecorum veniens : " Ac si diceret : Egrediebar a conspectu Dei, ut quae ventura sunt populo tuo, nuntiarem tibi, licet auditus non sim stante ibi Persarum principe, et contradicente tuis precibus vel meae legationi. Et ecce princeps Graecorum, id est, Angelus Macedonum veniebat : et ingressus in conspectu Dei ut

accusaret principem Medorum et Persarum, ut in eorum locis regnum Graecorum succedat. " Et sic videtur, quod contradictio fuit ibi inter tres Angelos.

5. Item, Super illud : Nunc revertar ut proelier adversus principem Persarum , dicit Hieronymus, quod " quilibet Angelus cupit potestatem suorum in terrenis crescere. "

Sed contra :

In beatis summa pax est, ut dicit Augustinus, et summa concordia. Ergo videtur, quod nulla discordia et nulla contradictio sit inter eos.

Solutio. Dicendum, quod contradictio non est in Angelis bonis simpliciter, sed secundum quid, scilicet per ostensionem diversorum meritorum, quae sunt in custoditis : et haec ipsa contradictio reducitur ad concordiam per ostensionem illuminationis desuper venientis : quando enim illam accipiunt, et in ipsa cognoscunt quid justum sit, concordant omnes in ostensam divinam voluntatem. Hieronymus tamen videtur intelligere principem Persarum et principem Graecorum de malis Angelis : quia aliter non esset verum quod dicit, quod isti sunt principes de quibus dicit Paulus : Qui non cognoverunt sapientiam Dei : si enim cognovissent, numquam Dominum gloriae crucifixissent , id est, crucifigi suasissent : et istorum etiam proprium est velle suos crescere in terrena potestate, ut dicit alia Glossa, ut multiplicato affectu terrenorum multiplicentur etiam peccata. Et hoc videtur etiam in Evangelio, ubi dicit Dominus, quod princeps hujus mundi ejicietur foras . Hoc etiam videtur Gregorius attestari in alia Glossa super eumdem locum Danielis, qui dicit sic : " Angelicos spiritus recte milites dicimus : quia decertare eos contra aereas . potestates non ignoramus : quae tamen certamina non cum labore, sed imperio peragunt. " Et haec Glossa accipitur de moralibus super Job, XXV, 2 .

Ex his ergo sive de bonis sive de malis Angelis intelligatur, patet solutio ad totum.

ARTICULI SEXTI