ARTICULUS II.

Utrum odor sit actus calidi et sicci ?

Secundo quaeritur, Qualiter odor sit actus calidi et sicci?

1. Dicitur enim in libro de Sensu et sensato, quod id quod facit in alio genere odoris, scilicet enchimum humidum in aere et in aqua similiter, hoc est, sicut in uno genere sensibilis in actu humido siccum permixtum facit saporem, ita et in alio genere, odoris scilicet sensibilis in actu sicco permixtum enchimum humidum, id est, saporosum, constituit odorem: et sic siccum erit principaliter constitutivum odoris, et humidum enchimum secundario.

2. Item habetur in libro de Anima, sic: Est autem odor sicci, sicut humor, id est, sapor humidi; olfactus autem instrumentum potentia est hujusmodi.

3. item, Omne conferens desiderium nutrimenti, necesse est principaliter constitui ex illis qualitatibus ex quibus cau- satur desiderium ejusdem: desiderium autem nutrimenti causatur a fame, et fames est appetitus calidi et sicci; ergo odor constituitur ex calido et sicco principaliter.

4. Praeterea, Sapor et odor conferunt alimentum, ut dicit Philosophus: aut ergo eodem modo, aut diversis modis. Si eodem modo, tunc erunt sensibilia ejusdem sensus, quod est impossibile. Si diversis modis: ergo cum in sapore dominetur actu humidum, et secundario insit ei siccum, necesse est ex contrario dominari actu siccum et secundario humidum.

Sed contra:

Omne quod immutat longe, quaerit terminos alienos: odor est hujusmodi: ergo quaerit terminos alienos. Prima probatur ex hoc quod stans in terminis suis, non recedit longe, Secunda patet ad sensum. Inde proceditur sic: Quidquid quaerit terminos alienos, principaliter est humidum: odor quaerit terminos alienos: ergo odor principaliter constituitur ex humido. Prima probatur per diffinitionem humidi: quia humidum est male terminabile proprio termino, bene autem alieno. Secunda autem probata est prius.

Solutio. Dicimus, quod odor principaliter constituitur in actu sicco, secundario in humido saporoso: et hoc contingit propter tres causas.

Quarum una est secundum quam odor refertur ad alimentum, cujus confert desiderium. Cum enim alimentum debeat incorporari, et omne quod incorporatur, necesse est subintrare in id cui incorporatur: non autem subintrat nisi in hoc quod est humidum subtile, ut per hoc quod est humidum, quaerat terminos alienos et terminetur ad partes ejus quod nutritur: et per hoc quod est subtile, sit penetrativum partium et partis partium, ut habetur in secundo de Ge-

neratione et Corruptione: necesse est saporem qui est in ipso alimento, principaliter consistere in humido, et secundario in sicco. Odor autem propter hoc quod non debet incorporari, ut prius habitum est, debet constitui opposito modo, scilicet principaliter ex sicco, et secundario ex humido saporoso.

Secunda causa est in comparatione ad organum sensus: illud enim frigidum et humidum est, ut supra habitum est: ergo sicut necesse est odorem esse calidum actu ut temperet excellens frigidum in cerebro, ita necesse est, quod in actu sit siccus ut temperet excellens humidum in eodem..

Tertia causa est in comparatione ad medium per quod est odoratus: hoc enim est medium extra, scilicet aer, et aqua. Dicit enim Aristoteles in primo Meteororum, quod vapor calidus et siccus omni vapore altius ascendit et citius. Ut ergo odores cito perveniant a longe ad odoratum, necesse est, quod sint in vapore actu calido et sicco.

Ad illud autem quod objicitur in contrarium, dicendum quod quaerere terminos alienos contingit propter duas causas, scilicet propter vehementiam passibilitatis, quia nullo modo stat in se: et sic humidum quaerit terminos alienos. Alia causa est propter vehementiam qualitatis activae: quia quaerit aliorum naturam in se transmutare: et sic calidum quaerit terminos alienos, et praecipue siccum: et hoc modo quaerit odor terminos alienos.