Acta Apostolicae Sedis - Commentarium Officiale208

CAESARAUGUSTANA-CORDUBENSIS

Beatificationis et Canonizationis Servae Dei Mariae Columnaris a Sacro Corde

(in saec. Mariae Columnaris Solsona Lambán), Religiosae professae ex Instituto

Filiarum Mariae Religiosarum Scholarum Piarum (1881-1966)

DECRETUM SUPER VIRTUTIBUS

«Meus cibus est, ut faciam voluntatem eius, qui misit me, et ut perficiam

opus eius » (Io 4, 34).

Haec evangelica sententia « ut faciam » assiduus exstitit index quo ducta

Serva Dei Domino fidenter se tradidit divinam excipiens voluntatem, etiam

versans in difficultatibus et tribulationibus quas ab infantia sustinuit. Illud

« ut faciam » solidum quoque fulcrum constituit in eius opera educationis ad

mulierem promovendam, ad Dei Regnum propagandum.

Tamquam fidelis filia spiritualis Sanctae Paulae Montal, humilitatem

excoluit veluti profundum suae sanctitatis fundamentum, quoniam virtus

haec fuit qua peculiariter claram se praebuit.

Serva Dei Maria Columnaris Solsona Lambán nata est Caesaraugustae, in

Hispania, die 22 mensis Decembris anno 1881, et baptismali aqua abluta in

paroecia Sancti Pauli die 24 eiusdem mensis et anni, nomina assumens Mariae

Columnaris, Amaliae, Honoratae. E parentibus eius quinque nati sunt liberi,

ex quibus Maria Columnaris tertia fuit. Cito tamen illa familia dolore afflicta

est ob obitum matris Margaritae. Tunc pater novum contraxit matrimonium

cum muliere Encratide Ascaso, cuius tamen imperiosa indoles ac filiorum

reprobatio causae exstiterunt ut discederet ab illis, de quorum educatione

avunculus curam adhibuit.

Die 5 mensis Februarii anno 1896, Maria Columnaris simul cum sorore

Margarita uti alumnae internae ingressae sunt in Collegium Calasanctianum

Caesaraugustae. Exemplaris alumna circum se pacem, serenitatem, com-

prehensionem ac dulcedinem irradiabat. Eminuit quoque studiis et summa

pollebat facultate linguas discendi, idoneitate ad depingendum et ad recitan-

dum. Anno 1905 publicum magisterii titulum obtinuit, quocirca a munere

discendi in munus docendi transiit; attamen vitam apud idem Collegium

gerere perrexit.

Illo in ambitu et in spiritali aura vivens, Serva Dei religiosam vocationem

maturare fecit, et mense Decembri anno 1906 simul cum sorore Margarita