Prologus Divi Hieronymi in Amos prophetam.

Ozias rex, cum Dei religionem sollicite aemularetur, nimio religionis amore provocatus, contra legem Moysi arrepto thuribulo, (ut in Historia secundi libri Paralipomenon ostenditur ,) sacerdotale officium praesumere conatus est. Ob eam rem, terraemotum in templo Dei exortum constat, cujus etiam Zacharias propheta meminit . Ante hunc itaque terraemotum, Amos propheta, temporibus praedicti regis et temporibus Jeroboam, filii Joas, regis Israel, in eas gentes quae lectione comprehensae sunt, iram Dei ob eas causas quas memoravit, affuturam denuntiat.

Et quia idem propheta in sequentibus ait : Super tribus impietatibus et super quatuor non convertam eum , tertio peccatorum indulgentiam Deum dare posse significat: quem quarto eadem peccata admittentibus, .nec paenitentiam nec indulgentiam daturum annuntiat. Nam per ignis similitudinem, quem in praedictas gentes immittendum praedixit, gravem atque irrevocabilem Dei iram ad eversionem earumdem civitatum processuram voluit demonstrare.

PROLOGI DIVI HIERONYMI IN AMOS PROPHETAM EXPLANATIO.

" Ozias rex, " de quo legitur IV Reg. XIV et II Paralip. XVI, " cum Dei religionem, " hoc est, sacerdotium ad Dei religionem constitutum, sollicite, " non discrete tamen, " aemularetur, " hoc est, aemulando sacerdotes diligeret. Ad Galat. IV, 17 : aemulantur vos non bene. " Nimio religionis amore provocatus. " Omne quod est nimium, vertitur in vitium. Nimis enim fuit, quando sacerdotale officium ita ampliare voluit, ut dignitatem regalem et sacerdotalem simul habere contenderet. " Contra praeceptum legis Moysi, " hoc est, datae per Moysen. Eccli, XXIV, 33 : Legem mandavit vobis Moyses in praeceptis iustitiarum. Maxime, Numer. I, 50, et XVI, 1 et seq., ubi

virga frondente et florente demonstratum est, quod non nisi ad summum Sacerdotem pertinet sacerdotale officium. " Arrepto thuribulo, " aureo scilicet, " ut in historia secundi libri Paralipomenon ostenditur 5, sacerdotale officium, " incensum scilicet ponendo, " praesumere conatus est, " hoc est, usurpare.

Et posito facto, quod peccatum fuit, ostendit signum per quod Deus demonstravit peccati enormitatem.

" Ob eam rem, " hoc est, propter tale peccatum, " terraemotum in templo Dei exortum constat. " Hoc enim narrat Josephus, quod propter peccatum illud ante civitatem scissa est media pars montis per quatuor stadia ad Occidentem, ita ut vias clauderet et urbes regias destrueret, sicut ex Josepho narrat Hieronymus. " Cujus etiam, " scilicet terraemotus,

Zacharias Propheta meminit, " sic dicens : Scindetur mons Olivarum ex media parte sui ad Orientem, et ad Occidentem, praerupta grandi valle . Et post pauca, v. 5 : Et fugietis, sicut et fugistis a facie terraemotus in die Oziae regis Juda. Quare autem hoc dixerit, subdit : " Ante hunc itaque terraemotum, " qui fuit scilicet temporibus Oziae, " Amos Propheta, " iste scilicet, " temporibus praedicti regis, " Oziae scilicet, regis Juda, " ettemporibus Jeroboam, " qui tempore Oziae regnavit in decem tribubus, " filii Joas, regis Israel, " de quibus IV Regum, XIV et XV, et II Paral. XV.

Quid autem prophetavit, et propter quod, subdit: " In eas gentes, " hoc est, contra eas gentes, " quae lectione, " hoc est, textu hujus prophetiae, primo et secundo capitulo, " comprehensae sunt, " hoc est, continentur, " iram Dei : " et antequam subjungat, qualiter ira Dei processerit, parenthesim facit de causa : " Ob eas causas quas memoravit, " hoc est, in prophetia expressit, " affuturam denuntiat iram Dei. " Psal. XXIX, 6 : Ira in indignatione ejus.

Et subjungit secundam partem, quae est de modo principii Prophetiae.

" Et quia idem Propheta in sequentibus, " scilicet prophetiae capitulis, " ait, " primo scilicet et secundo capitulo, " super tribus impietatibus, " Septuaginta translatio, " et super quatuor non convertam eum, " hoc enim octies dicit. " Tertio peccatorum indulgentiam Deum dare posse significat, " hoc est, super peccato consensus, operis, et consuetu- dinis : hoc enim per paenitentiam remittit Deus. Ezech. XVIII, 21 et 22 : Si peccator egerit paenitentiam ab omnibus peccatis suis, quae operatus est,.... omnium iniquitatum ejus, quas operatus est, non recordabor. " Quem, " Deum scilicet, " quarto eadem peccata admittentibus, " hoc est, per desperationem adjungentibus, et finali impoenitentia sic decedentibus, " nec paenitentiam, " hoc est, gratiam paenitendi, " nec indulgentiam, " in remissionem scilicet peccatorum, " daturum annuntiat. " Ita oportet quod exponatur, vel contrarium erit ei quod dicitur, Matth. XVIII, 22 : Non dico tibi, Petre, dimitte usque septies, sed usque septuagies septies. Ad Tit. III, 10 et 11 : Haereticum hominem, post primam et secundam correptionem devita : sciens quia subversus est, qui ejusmodi est, et delinquit,cum sit proprio judicio condemnatus . Quod autem hoc verum sit, probat, subdens : " Nam, " id est, quia " per ignis similitudinem, " hoc est, metaphoram, " quem, " scilicet ignem, "in praedictas gentes, " octo scilicet, " immittendum praedixit, " octies scilicet dicendo : Mittam ignem, " gravem, " scilicet in afflictione, " atque irrevocabilem, " humana scilicet protestatione, " Dei iram. " Thren. II, 4 : Effudit quasi ignem indignationem suam. " Ad eversionem earumdem civitatum, " quas scilicet nominat in primo et secundo capitulo, " processuram voluit demonstrare. " Deuter. XXXII, 22 : Ignis succensus est in furore meo, et ardebit usque ad inferni novissima.