PROLOGI DIVI HIERONYMI IN ZACHARIAM PROPHETAM EXPLANATIO.

" Anno. " In prologo isto Hieronymus ponit ordinem istius prophetiae, intentionem, et materiam, et probat haec per auctoritates Esdrae, Zachariae, et Isaiae. Et secundum hoc dividitur prologus, sicut cuilibet patere potest.

" Anno secundo Darii, " filii Hystaspis scilicet, qui (sicut dicit Hieronymus) fuit annus quadragesimus primus a primo Cyro, qui licentiam dedit redeundi, " regis Medorum, " qui in Media et Perside regnavit, " Aggaeum, et Zachariam prophetasse, " id est, ad prophetandum inspiratos fuisse, " lectiones eorumdem declarant. " Aggaeus enim sic dicit, I, 1 : In anno secundo Darii regis, in mense sexto. Zacharias autem sic, I, 1 : In mense octavo, in anno secundo Darii regis, factum est verbum Domini.

Et subdit de ordine :

" Sed hac de causa Aggaeus Zachariae in ordine Prophetarum, " duodecim scilicet, " praelatus, " id est, praepositus,

" videtur " ab his qui Prophetas ordinaverunt, " quod eum, " scilicet Aggaeum, " duobus mensibus, ut praedictae 1. lectiones ostendunt, " in principiis scilicet, " in prophetia praecessisse invenitur. In principio enim Aggaei dicitur : In mense sexto, in una die mensis. In principio Zachariae : In mense octavo, et sic duobus mensibus Aggaeus ante Zachariam prophetavit.

Et subjungit de intentione :

" Ad restaurationem etiam templi, " supple, sicut Aggaeus, " praecepto Domini populum animasse, " per exhortationem scilicet, " ut Esdras refert, dicens : " 1 Esdrae, IV, 24 et v, 1 : et sunt haec verba in Esdra paucis immutatis, in quantum una translatio differt ab altera . " In anno secundo Darii regis, " filii scilicet Hystaspis, " prophetaverunt Aggaeus et Zacharias, filius Addo Prophetae, " hoc est, propheticam inspirationem acceperunt, " super Judaeos qui erant in Judaea et in Jerusalem. " Hoc dicit ad comparationem eorum qui adhuc erant in Babylone, et necdum redierant : multi enim postea redierunt cum Esdra anno septimo, sicut dicitur, I Esdrae, VII, 1 et seq.: multi cum Nehemia anno decimo Artaxerxis, sicut dicitur, II Esdr. I, 1 et seq. " In nomine Dei," supple, prophetaverunt " super Israel, " et sunt adhue verba Esdrae et ea quae sequuntur.

" Tunc surrexerunt Zorobabel, filius Salathiel, " qui scilicet fuit loco regis, " et Jesus, filius Iosedec,)) summus Sacerdos scilicet, " et principes ejus, " Zorobabel scilicet, " et indicaverunt aedificare domum Dei, quae est in Jerusalem. " Inchoaverunt dicit, quia jactis fundamentis et constituto altari impediti sunt ab opere. " Quibus, " scilicet Regi, et Sacerdoti, " cum adessent Prophetae, " Aggaeus scilicet, et Zacharias per cooperationem, " exhortatione sua adjuverunt eos, " confortando scilicet et animando ad opus. Haec est ergo intentio litteralis et finalis.

Secundo autem etiam intendit a peccato revocare populum:

" Nam et populum Israel, " hoc est, generaliter Judaeos, " ab imitatione paternorum delictorum, " hoc est, ne imitentur paterna delicta, " per suam commonitionem, hic Propheta, " Zacharias scilicet, " cupiens revocare, verbis lectione comprehensis usus est. " Zachariae, I, 4 : Ne sitis sicut patres vestri, ad quos clamabant Prophetae priores. Et paucis interpositis subdit, v. 8 : " Vidi per noctem, et ecce vir ascendens super equum rufum."

Aliam translationem ponit, quam visionem Hieronymus exponens, subdit :

" Vidit Propheta, " Zacharias scilicet, virum " in equo rubeo sedentem, " hoc est, Angelum in specie viri, " et stantem in medio myrteti umbrosi, " quasi paratum ad vindictam. " Cujus visionis " quae Zachariae, I, 8, continetur, " secundum traditionem Hebraeorum , " mendosam scilicet et falsam, " haec solutio est, " id est, expositio : " Vir ascendens super equum rubeum, " in visione ostensus, " licet Angelus intelligatur " visibiliter apparens,

" tamen quia praedicti coloris, " rubei scilicet, " equum conscendere visus est, " qui color rubeus sanguini similis est, " vindictam sanguinis, " hoc est, occasionis, " in eam, " hoc est, contra eam, " gentem significat proferendam, " a Deo scilicet, " quae, " scilicet gens, " populum Israel in captivitatem redegerat, " ut ex hoc animarentur Judaei, videntes vindictam fieri de inimicis.

Et hanc expositionem confirmat, subdens :

" Nam et Isaias Propheta per ruborem vestimentorum, " regis scilicet Israel Isaiae ostensi, " inter gentes, " hoc est, contra gentes, " vindictam cum sanguine, " hoc est, interfectionem " a Deo proferendam demonstrans, " secundum Hebraeos scilicet, " his verbis usus est dicens, " rubore scilicet vestium sanguinem significando : " Quis est iste qui venit de Edom, rubor vestimentorum ejus ex Bosor ? " Ponit aliam translationem : nostra enim sic habet : Quis est iste qui venit de Edom, tinctis vestibus de Bosra ?

Et subdit exponens residuum visionis :

" Stantem vero virum in medio myrteti umbrosi, " supple, quod dixit Zacharias, " laetitiam populo affuturam, " de liberatione scilicet per myrteti significationem, " quod virens et odoriferum est, " voluit designare, " Zacharias scilicet.

Et hoc probat subdens : " Ejus ligni Moyses in Levitico, " de laetitia scilicet et festo tabernaculorum agens, " cum faceret mentionem, ait : Accipietis die prima fructus ligni speciosi, " hoc est, ramos cum fructibus, quimyrtelli dicuntur. Quod exponens, subdit : " Ut laetitiam populi, " Israel scilicet, " per bene olentis ligni et speciosi umbraculum, " myrti scilicet, " demonstraret, " ipse scilicet Moyses.

Quod exponens infert :

" Sed hanc visionem, " Zachariae scilicet, " quae liberationem populi, " pro una parte sui, " et vindictam de adversariis, " pro alia parte, " futuram demonstrat,)) hoc est, significat, " ob hoc, " id est, propter hoc, " nocte Propheta se vidisse memoravit , " hoc est, descripsit, " quia populum Israel in aegypto, supple, detentum, " etiam prima liberatione, " supple, a Pharaone, " de terra aegypti noctu discessisse constabat . "

" Cujus exempli, " nocturnae scilicet liberationis, " praesens populus, " de Chaldaea rediens, " aliquam partem, " per similitudinem scilicet nocturnae revelationis, " in se retinere videbatur : " supple, et ideo, " liberatio ejusdem, " scilicet populi, " ac reditus captivitatis, " hoc est captivorum, " de terra Chaldaeotum, " ad quam captivi ducti fuerant, " per noctem, " hoc est, tempore nocturno, " Prophetae, " scilicet Zachariae, " revelata est. "