COMMENTARIUS.

(b) Tunc ad rationem. Hic loquitur Doctor de objecto motivo, et dicit quod nihil est objectum adaequatum intellectus, nisi in quo salvatur ratio omnis illius, ad quod potest se extendere, id est, quod nihil potest esse objectum motivum adaequatum intellectus, respectu plurium intelligibilium, nisi ratio formalis illius sit ratio cognoscendi omnia illa, et hoc est quod dicit; et tale objectum singulare, quod est ratio formalis intelligendi omnia intelligibilia, non potest esse aliquod creatum, quia illud esset formaliter infinitum. Addit Doctor quod objectum adaequatum intellectus Angeli est aliquid commune ad omnia per se intelligibilia, et quia sub tali communi continentur etiam sensibilia, quae possunt partialiter causare speciem intelligibilem sui, et extra speciem intelligibilem sunt tantum intelligibilia in potentia, ut vero relucent in specie intelligibili, sunt intelligibilia in actu, et sic patet responsio ad argumentum, quod intellectus Angeli potest habere aliqua objecta intelligibilia in potentia: et quod dicit Doctor quod oportet intellectum Angeli esse aliquod commune, de ista communitate, vel praedicationis, vel virtualitatis, vide in primo, dist. 3. q. 3.