32. Feria III. Paschatis.

la. Cantu Christo diligenti
Jubilemus, qui redempti
Sumus ejus sanguine:

1b. Qui, cum patri sit aequalis
Deus, fieri mortalis
Voluit pro homine.

2 a. De coeli missum solio
Verbum sine principio
Factum est in tempore,

2 b. Vivificatur moriens,

Jam mortem subit Oriens
Pro mundi facinore.

3 a. Hic est agnus ille Dei,
Quo justificantur rei,
Agnus inquam, quem Hebraei
Immolant ad vesperum.

3 b. Cujus cruor munit postes,
Ut salventur inter hostes,
Qui post dies Pentecostes
Nil sentiant asperum.

4 a. Ara crucis immolatur
Haec salutis hostia,

In sepulchro collocatur,
Surgit die tertia,

Miser homo reparatur
Data sibi venia.

4b. O quam lignum pretiosum,
Quo mors mortem diluit,
. O sepulchrum gloriosum,
In quo vita jacuit,
Dum infernum tenebrosum
Frangens suos eruit.

5 a. Princeps mortis quondam fortis
Dum in pace fuerat,

5 b. Fortioris vinctus loris

Perdit, quos possederat.

6 a. O triumphus inennarrabilis,
De superbo triumphans humilis
Distribuit spolia.

6b. Victor mortis solutis legibus
Redit suis receptus sedibus
Ad patrem cum gloria.

7 a. Mira coelum laude sonat,
Mira namque Christus donat
Hominibus munera,

7 b. Carnem diu captivatam
Hoste victo liberatam
Locat super aethera.

8 a. Te rogamus ergo, Christe,
Ut repellas, quidquid triste
Suggerunt carnalia;

8 b. Fac concives angelorum,
Regna nobis dans coelorum
Et aeterna gaudia.