84. De beata Maria V.

la. Gaude, mater Sion, gaude,
Corde, voce, manu plaude,
In reginae coeli laude
Attollens praeconium.

1b. Fac in die domus Dei
Pari voto psallas ei,
Per quam flentes, per quam rei
Sunt nacti remedium.

2 a. Prima parens paradisum
Clausit nobis, trusit visum,
Facti sumus in derisum
In conspectu bostium.

2 b. Stultus Adam, primus homo,
Est expulsus Dei domo,
Subit poenam, perdit pomo
Patriam vitalium.

3 a. Per hunc fructum Evae fructus
Ex natura fit corruptus,
Inde dolor, inde luctus
Finibus terrestrium.

3 b. Hoc te fructu condolentes,
Obstupescunt nostri dentes,
Paradiso pulsi flentes
Subimus exsilium.

4 a. Nobis diu exsulatis
Dolet pater pietatis
Et misertus desolatis
Suum mittit filium.

4b. Inclinavit majestatem
Nostram ad humilitatem,
In ancillae castitatem
Assumens hospitium.

5 a. Hospitata Dei prole,
Stellas maris mixto sole
Gravidatur sine mole
Virginale gremium,

5 b. Quo procedit specialis,
Fructus aegris medicalis,
Aufert morbos, confert malis,
Perimit daemonium.

6 a. Sit hic fructus benedictus,
Cedit hostis, iniit victus,
Homo lapsus stat rescriptus
In libro viventium.

6b. Benedicta radix Jesse,
Nos vitali replens messe,
Quae dat servos salvos esse
Suum per obsequium.

7 a. Virgo mater, o Maria,
Virgo clemens, virgo pia,
Virgo, per quam patet via
Ad coeli palatium.

7 b. Pietatem imploramus,
Proclamantes te rogamus,
Confer nobis, quod optamus,
Filium propitium.