CAPUT XXI. De luxuria.

Luxuria est ex immundis desideriis veniens lubrica mentis et carnis prostitutio.

Item, Luxuria est libidinosae voluptatis appetitus : et intelligas hic appetitum, qui est ex consensu rationis, quia talis appetitus est peccatum mortale : et dicitur peccatum mortale, quando ratio non cohibet hujusmodi appetitum cum posset.

Differentiae luxuriae sunt octo. Prima est fornicatio, quae est soluti cum soluta. Secunda est meretricium, quod fit dupliciter, scilicet, per vagam libidinem cum diversis peccando, vel cum publice venali concumbendo. Tertia est adulterium, quo conjugalis thorus vitiatur. Quarta est stuprum, quo virginalis integritas corrumpitur. Quinta est sacrilegium quo continentia Deo dicata laeditur, ut in clericis et religiosis, sacris ordinibus sublimatis, et in his qui emiserunt votum continentiae. Sexta est incestus, quo vinculum consanguinitatis, vel affinitatis vel compaternitatis corrumpitur. Septima est peccatum contra naturam sive sodomia, quo naturalis usus pervertitur. Notandum autem, quod aliud est contra naturam speciei, aliud contra naturam generis. Primo modo omne peccatum mortale est contra naturam speciei, quia in rationali creatura remurmurat synderesis contra omne peccatum. Sed secundo modo peccatum sodomiae est contra naturam generis, quia non solum in homine, sed etiam in brutis diversi sexus in coitu conveniunt. Unde si alio modo fit, contra naturam generis est, Octava est libidinosus coitus conjugalis, qui multipliciter accipitur.

Coitus enim conjugalis alius licitus est, alius fragilis, alius impetuosus. Licitus tripliciter : ut quando causa prolis fit, vel ad ampliandum cultum Dei, vel causa reddendi debitum, vel causa vitandae fornicationis non in se, Sed in conjuge. Primus est pietatis : secundus justitiae : tertius cautelae. In his nullum dicitur peccatum esse. Fragilis est quando fit causa delectationis, et tunc distinguitur: quia si amor illius delectationis praeponitur Deo, mortale peccatum est : sivero postponitur, veniale. Impetuosus est, qui ex sola libidine proveniens, metas honestatis et rationis transcendit, quod fit quinque modis : primo causa satiandae libidinis per meretricias blanditias : secundo, cum fit contra naturalem modum: tertio, cum fit tempore prohibito : quarto, quando fit in loco prohibito : quinto, quando acceditur ad muli?rem praegnantem, et vicinam partui, vel quae est in fluxu menstruo.

Filiae luxuriae sunt octo secundum Gregorium. Prima est caecitas mentis, quia secundum Augustinum, in opere luxuriae tota ratio absorbetur. Secunda est inconsideratio, mortis scilicet et inferni. Tertia est inconstantia, scilicet ad cogitandum desiderandumque nunc istud, nunc illud. Quarta, amor sui, scilicet quo aliquis desiderat longam vitam Ad hoc, ut expleat voluptatem suam. Quinta, praecipitatio, qua quis praecipitanter currit ad peccandum, exponens se periculo mortis propter luxuriam faciendam. Sexta, odium Dei, quia Deus abstrahit se ab eis, et punit eos qui sequuntur carnis delicias, ad quas inclinat luxuria. Septima, affectus praesentis saeculi, scilicet appetitus honorum, divitiarum, sanitatis, fortitudinis, et hujusmodi : per quae luxuriosus finem suum consequitur. Octava est desperatio faturi saeculi, quae est diffidentia gloriae, vel veniae consequendae, et haec est filia luxuriae consummatae.

Luxuria nocet multipliciter, Deo est contumeliosa, quia templum eius inquinat. Daemonibus placita. Job, xl, 16 : Behcmot sub umbra dormit, in locis, etc. Subjecto proprio nociva. I ad Corinth. VI, 18 : Qui fornicatur, in corpus, etc. Proximum scandalizat. Osee, v, 1 : Facti estis speculatio, et rete expansum super, etc. Animam propriam damnat. II Reg. xii, 10 : Non recedet gladius de domo tua, hoc dictum fuit ad David propter peccatum Bethsabee. Vilissimo domino se subjicit, scilicet carni et sensualitati. Genes. III, 17 : Quia audisti vocem uxoris tuae,... maledicta, etc. Mentem infatuat.

Osee, IV, 11 : Fornicatio et vinum auferunt cor.

Remedia luxuriae sunt haec: occasiones fugere. Job, XXXI, 1 : Pepigi foedus cum oculis meis, ut ne cogitarem, etc. Eccli. XIII, 1 : Qui tetigerit picem, inquinabitur ab ea. Eccli. XXVI, 10 : Qui tenet Ulam, quasi qui apprehendit scorpionem. Mortis extrema cogitare. Eccli. VII, 40 : Memorare novissima tua, et in aeternum non peccabis. De se non praesumere : quia cecidit David sanctissimus, Salomon sapientissimus, Samson fortissimus. Frequenter se occupare. Hieronymus : " Semper aliquid boni facito, ut te dia-" bolus inveniat occupatum. " Tentationi In principio resistere. Genes. III, 15 : Ipsa conteret caput tuum. Carnem domare. Marci, IX, 28 : Hoc genus daemoniiin nullo potest exire, nisi in oratione et jejunio.