CAPUT XXIV. De Ascensione Christi.

Differentia est inter ascensionem, et assumptionem, et evolationem : quoniam ascensio pertinet ad Christum, assumptio ad beatam Virginem, evolatio autem ad alios sanctos. Et ratio hujus est, quoniam ascensio fit propria virtute ascendentis, assumptio autem virtute Christi assumentis, qua Filius obsequitur matri : evolatio vero fit ministerio Angelorum. Alia est differentia, quia locus evolantium est distinctio chororum : locus vero assumptae Virginis est super choros Angelorum : locus vero Christi ascendentis est supra vel ultra locum assumptae Virginis .

Circa ascensionem Christi oclo sunt consideranda quae circumstant ascensionem, et colliguntur ex officio de Ascensione. Primum est, quod scilicet elevatus est videntibus omnibus discipulis , ut desiderium veniendi ad ipsum excitaretur in eis. Secundum est, quod nubes suscepit eum ab oculis eorum . Per umbram nubis figuratur, quod in hoc mortali corpore Jesum in alto videre non possumus. Tertium est, quod elevatis manibus ferebatur in caelum . Elevavit autem manus propter duo, scilicet ut suos Patri offerret, et ut inimicos alte retracta manu percuteret Quartum est, quod benedixit eis , ut eos contra hostem muniret, et bonis caelestibus augeret Quintum est, quod ascendit in jubilatione , quod refertur ad vocem jucunditatis redemptorum ascendentium cum ipso, qui prius voce lacrymabili in portis inferni clamaverunt : " Advenisti desiderabilis, quem exspectabamus in tene. hris. " Sextum est, quod ascendit in voce tubae , quod refertur ad sonum praedicationis Apostolorum, qui sonus fuit eis injunctus, dicente Domino, Marc. XVI, 15 : Euntes in mundum, universum, praedicate Evangelium omni creaturae, etc. Ex tunc enim in omnem terram exivit sonus eorum . Septimum est, quod ascendens in altum captivam duxit captivitatem , id est, captivos captivitate inferni, quos secum victor captivos eduxit. Octavum est, quod, dedit dona hominibus : quia omnia bona nostra desursum sunt, quo Christus ascendit. Horum prima duo habentur Ex Actibus, sed tertium et quartum ex fine Evangelii secundum Lucam. Quintum et sextum ex Psalmo. Item septimum et octavum ex Psalmo.

Ascendit Christus regressus ad caelum

multipliciter,scilicet tamquam verus obediens completa obedientia, quoad Patrem : tamquam bonus mediator facta pace et concordia, quoad homines : tamquam strenuus propugnator contra daemones.

Ascendit Christus pluribus de causis, scilicet ad quiescendum post labores qui bus fatigatus fuit triginta tribus annis nobis serviens. Ad intercedendum pro amicis, pro quibus utiliter laboravit. Bernardus: " Securum accessum habes, o " homo, ad Deum, ubi. habes Filium me-" diatorem, et Matrem interventricem. " Filius ostendit Patri latus, et vulnera : " mater ostendit Filio pectus et ubera. " Ibi nulla potest esse repulsa, ubi tot " concurrunt amoris insignia. "

Christus ergo optimus advocatus est, qui tot habet linguas pro nobis loquentes, quot vulnera pro nobis accepit. Ad conquerendum de inimicis pro quibus vires suas inutiliter expendit. Isa. xlix, 4 : In vacuum laboravi, Item, ascendit Christus, ut nobis locum praepararet Joan. XIV, 2 : Vado parare vobis locum. Ut fiduciam in ipsum sperandi nobis tribueret : ut in corporalem possessionem aeternae haereditatis nos mitteret Joan. XVI, 7 : Si enim non abiero, Paraclitus non veniet ad vos. Ut desiderium nostrum post se traheret. Cantic. I, 3 : Trahe me post te. Ut viam nobis ad caelum ostenderet, quia sicut dicitur, Luc. XXIV, 50, eduxi l Dominus prius discipulos suos foras civitatem in Bethaniam, ut ipsa eductione cognoscerent se hic non. habere manentem civitatem. Quod autem in Bethaniam eduxit eos prius, quae interpretatur domins obedientiae, significat quod per bonum obedientiae transituri essent ad caelestia, Post hoc fecit eos transire in montem Olivarum, ut per montem intelligatur

eminentia spiritus in contemplatione, per olivas autem pinguissimi pectoris devotio. Ulterius vero post ista non restat nisi saltus animae in caelum. Exaltatus autem fuit Christus tripliciter, scilicet in terra per vitae meritum : super terram per crucis suspendium : super caelos per ascensionis jubilum. Ascensio Christi fuit Angelis mirabilis. Isa. lxiii, 1 : Quis est iste qui venit de Edom, tinctis vestibus de Bosra ? Daemonibus terribilis. I Reg. IV, 8 : : Non fuit tanta exsultatio heri et nudius tertius : vae nobis ! Haec sunt verba Philistinorum quando vociferabamur filii Israel dum adduceretur arca foederis in Silo in castra, ut per eam haberent divinum adjutorium in praelio Hominibus salutaris, sicut supra patet de multiplici fructu ascensionis Christi.

Ascendit Christus multipliciter, scilicet potenter : quia elevatis manibus... ferebatur in caelum . Patenter : quia videntibus illis elevatus est . Gaudenter : quia ascendit in jubilatione . Decenter : quia cum duabus turmis regrediebatur, scilicet hominum et Angelorum. Non autem dico, quod ibi. fuerint Angeli in adjutorium necessitatis, sed in obsequium dignitatis. Homines quoque, illos dico quos de inferis liberavit, et qui post resurrectionem usque ad ascensionem mortui sunt de numero salvandorum, nec purgatorio ulterius indigentes. Clementer : quia benedixit eis , Christus non statim post resurrectionem caelum ascendit, triplici ratione. Prima, quia differenda erat ascensio ut multipliciter probaretur resurrectio, ut dicitur, Act. I, 3 : In multis argumentis per dies quadraginta apparens eis. ''Secunda est, ut patientiam nostram informaret, quia mercedem debemus aequanimiter exspectare, sicut agricola non statim post seminationem metit, sed fructuum maturitatem exspectat. Tertia est propter discipulorum consolationem, unde dicit Glossa super Act. I, 3 : " Sicut quadraginta fuerunt horae mortis Christi, ita quadraginta diebus cum eis conversatus est post resurrectionem, quia consolatio divina excedit tristitiam humanam. "

Nota, quod Christo convenit descendere de caelo tantummodo secundum divinam naturam, quia Deus illuc venire dicitur, ubi speciali effectu apparet : sed ascendere proprie ei convenit secundum humanam naturam, quia secundum illam solummodo mutat locum, non secundum divinam naturam.