CAPUT IV. De sanctificatione materna.

Sanctificatio triplex est : quaedam communis, quae fit per sacramenta : quaedam specialis, quae fit per gratiam Spiritus sancti: quaedam specialissima, quae fit per gratiam singularem. P rima removet culpam, et confert gratiam, remanet tamen fomes et pronitas ad peccandum, et talis est in baptizatis. Secunda removet culpam et pronitatem peccandi mortaliter, et talis fuit sanctificatio Joannis Baptistae, et Jeremiae in utero. Tertia removet culpam originalem, et pronitatem ad peccandum tam venialiter, quam mortaliter, et talis fuit in beata Virgine. Et licet gratia sanctificationis in utero sit quantum ad essentiam major quam sacramentalis, tamen quantum ad aliquos effectus, major est gratia sacramentalis : quia baptismus imprimit characterem, et aperit januam caeli, et habilitat hominem ad alia sacramenta, quorum nihil facit sanctificatio in utero ex se. Verumtamen gratia sanctificationis in utero praecellit in hoc gratiam baptismalem, quia taliter sanctificatus non potest mortaliter peccare, et ad venialia minus inclinat eum fomes : propter quod mitiora et pauciora venialia committit: et talis gratia fuit in Joanne Baptista : et ideo ne in vanum grat iam Dei reciperet, fugit hominum societatem, et arctissimam in se paenitentiam tenuit, ne levi saltem maculare vitam famine posset . Patet igitur, quod in sanctificatione in utero confertur gratia media inter gratiam sacramentalem, et gratiam plenae confirmationis in patria, quae habet conjunctum sibi finem ultimum.

Ad confirmationem enim perfectam tria pertinent. Primum est inseparabilis adhaesio et conjunctio rationis ad Deum. Secundum est indeflexibilis subjectio inferiorum potentiarum animae sub imperio rationis. Tertium est indiscontinualis conversio actualis totius hominis inDeum, quando homo divina dulcedine affectus, ex toto corde, et ex tota anima, et ex omnibus viribus semper actu tendit in Deum, et in quodcumque aliud in quo relucet Deus. Primum horum habet gratia sanctificationis simpliciter, ut scilicet nullus, qui particeps ejus fuerit, possit peccare mortaliter. Secundum habuit beata Virgo, et ideo nec venialiter umquam peccavit, sicut dicit Augustinus. Tertium autem non potest convenire gratiae viae, eo quod illud ex fruitione Dei causetur, quae tantum est in patria.

Tres autem luerunt sanctificationes Matris Dei. Prima fuit sanctificatio in utero : et haec tres habuit effectus, scilicet originalis culpae expiationem, et gratiae infusionem, et fomitis tantam restrictionem, ut non posset in aliquod mortale peccatum duci : licet tamen ipse fomes maneret secundum essentiam. Secunda sanctificatio fuit in Spiritus sancti obumbratione, et Filii Dei conceptione, quae tribus praemissis duo superaddidit, scilicet omnimodam fomitis exstinctionem,et confirmationem in bono, ita quod quae prius non poterat peccare mortaliter, jam non posset peccare. Hos autem duos

effectos expressit Angelus, Lucae, I, 35 : Spiritus sanctus superveniet in te, quoad primum. Et virtus Altissimi obumbrabit tibi, quoad secundum. Ista confirmatio non fuit liberi arbitrii ablatio, sed ejus per gratiam completio. Praeterea, Spiritus sanctus supervenit in eam non solum ad sanctificandum, sed etiam ad foecundandum, cujus virtute Virgo concepit, Virgo peperit, et post partum Virgo permansit . Tertia sanctificatio fuit in Filii Dei inhabitatione, qui novem mensibus in utero ejus mansit, et his omnibus praedictis duos effectus addidit. Unus fuit, quod omnes dispositiones fomitis sublatae fuerunt, sicut quando morbus est curatus, adhuc interdum remanent reliquiae curandae, Secundus fuit dedicatio ad divina, ita quod etiam licitis usibus mundanis, scilicet matrimonialibus, eam optare esset impossibile : quia tunc non solum mens, sed etiam corpus luce divinitatis resplenduit, ut significatum est, Ezechiel. xliii, 2 et seq.

Ex praedictis collige, quod fomes et personam inficit, et naturam. Personam quidem, quia ad malum pronam facit, et stimulat ad. peccatum. Naturam vero, quia carnem inficit, prout est principium ad alteram carnem. Sed beata Virgo in prima sanctificatione, quae fuit in utero, mundata fuit ab originali peccato, in quantum fomes respicitpersonamsuam : quia nihil in persona sua purgandum remansit. In secundavero sanctificatione, quae fuit quando Spiritus sanctus supervenit in eam, purgata fuit a fomite, prout ipse fomes respicit naturam in comparatione ad prolem propagandam, non opere naturae, sed opere Spiritus sancti. Remotus enim fuit essentialiter, propter quod pars ab ea separanda in corpus Christi, nihil habuit de fomite, sicut nec mater.

Nota similiter ex praedictis et ex sequentibus, quod beata Virgo ex prima sanctificatione excellebat puritate omnes baptizatos : ex sanctificatione secunda excellebat puritatem Adae quam habuit ante peccatum : per confirmationem excellebat puritatem Angelorum, quoniam illi nec crescere possunt in praemio substantiali, sive essentiali, sicut nec decrescere : Sed beata Virgo proficere potuit in merito, et non deficere.

Puritas Matris Dei fuit quadruplex, in qua nulla creatura sibi poterit comparari. Prima est puritas sanctificationis in utero. Omnis enim rationalis creaturae puritas, vel est naturae, ut in Angelis : vel est gratiae gratis datae, ut fuit innocentia primi status hominis : vel est gratiae gratum facientis, et ista est major aliis duabus. Unde cum in illa specie gratiae sanctificatio Matris Dei fuerit suprema, patet quod vincit puritatem omnis purae creaturae. Secunda est puritas innocentiae in vita, in qua similiter omnes excellit : quiabeata Virgo vixit sine omni peccato, et hoc oportuit esse maximae gratiae, quae non solum ipsius naturam perficeret, sed eam supra legem naturae corruptae extolleret. Tertia est puritas virgineae castitatis, in qua excellit et Angelos, et homines. Angelos quidem : quia secundum Hieronymum hoc retinuit per virtutem castitatis, quod in Angelis est necessitatis naturae. Item, excellit homines in hoc, quia primum exemplar fuit hujus integritatis. Psal. xliv, 15 : Adducentur regi virgines post eam, etc. Praeterea, ostenditur istud alia ratione : quia summa est haec puritas quae potius potest suum contrarium secum pati, quam possit violari : et talis fuit virginitas Dominae nostrae, quod gaudium matris habet cum virginitatis honore : et ideo nec primam similem visa est, nec habere sequentem. Quarta est puritas sanctificationis ex superventione Spiritus sancti, et praesentiae Dei, in qua similiter excellit omnem creaturam. Cum enim esse matrem Dei sit dignitas superior, quam quae purae creaturae communicari possit,

necesse est gratiam ad hoc disponentem esse majorem omni gratia purae creaturae. Oportet ergo privilegium sanctificationis suae in hac parte omnem aliorum sanctificationem excedere.