Caput III.

De caetero, fratres mei, gaudete in Domino.

Non in rebus humanis, vel in aliquo praeterquam in Domino gaudeatis.

Eadem vobis scribere mihi quidem non pigrum. Eadem repetere, quae praesens dixeram.

0848B Vobis autem necessarium. Sicut horto crebrius irrigari.

Videte canes. Hic contra pseudoapstolos ait Christi Evangelium lacerantes.

Videte malos operarios. Qui quod nos bene construximus, destruere conantur.

Videte concisionem. Concisio enim potius, quam circumcisio sunt dicendi.

Nos enim sumus circumcisio, qui spiritu servimus Deo. Nos sumus viri Judaei, qui non unius membri pellem, sed totius carnis vitia amputamus, spiritualiter scilicet circumcisi.

Et gloriamur in Christo Jesu: et non in carne fiduciam habentes. In sola fide Christi, non in circumcisione carnali.

0848C Quamquam et ego habeam confidentiam in carne. Ne quis putet me hoc ideo dicere, quia ego gloriandi causam non habeam, et idcirco non glorier.

Si quis alius videtur confidere in carne, ego magis circumcisus octavo die, et ex genere Israel. Quia ex illis forte aliqui erant proselyti: ego secundum genus, non post annos, ut aliqui peregrini.

De tribu Benjamin. Quae semper cum Juda conjuncta fuit.

Hebraeus ex Hebraeis. Non ex gentibus proselytus.

Secundum legem pharisaeus. Legisperitus, vel divisus a turba, qui non possem posse quod probarem.

Secundum aemulationem persequens Ecclesiam Dei. Tantam habui aemulationem, ut nescius etiam Ecclesiam insectarer.

0848D Secundum justitiam, quae in lege est. Primus fui in omnibus, in quibus illi falso gloriantur: sed quia hoc tempore illa non valere cognovi, ideo illa nullius duco momenti, et tamquam impedimenta projicio, quibus me vitam acquirere posse putabam.

Conversatus sine querela. Omnium justificationum, et caeremoniarum purificationem, et mandata complebam: sed haec nulla putavi, dum crederem Christo, quae lex ipsa promiserat.

Sed quae mihi fuerunt lucra, haec arbitratus sum propter Christum detrimenta. Ad comparationem inventi auri, contemnitur aeramentum, quamvis ab uno sit conditum, et pro temporis qualitate necessarium.

0849A Verumtamen existimo omnia detrimentum esse, propter eminentem scientiam Jesu Christi Domini mei, propter quem omnia detrimentum feci, et arbitror ut stercora. Stercora ciborum sunt reliquiae, et quondam rerum utilium purgamenta.

Ut Christum lucrifaciam, ut et inveniar in illo. Ut Christum habeam caput, et ejus inveniar membrum.

Non habens meam justitiam, quae ex lege est. Hoc est, ex meo labore quaesitam.

Sed illam quae ex fide est Christi Jesu, quae ex Deo est justitia in fide. Sed illam quae a Deo proprie, et sola fide collata est Christianis.

Ad cognoscendum illum. Ut beneficium ejus perfecte cognoscam.

Et virtutem resurrectionis ejus. Quia ideo surrexit, 0849B ut nos similiter resurgamus. Qui autem hoc vere cognoscit, satis agit, si omnino non peccet.

Et societatem passionis illius; configuratus morti ejus. Si enim compatimur, et convivemus.

Si quomodo occurram ad resurrectionem, quae est ex mortuis. Ad illam quae perfectorum est proprie, non ad illam, quam etiam invitos habere necesse est.

Non quod jam acceperim. Quia mundi nondum finis advenit: sed in spe est, quod credimus, non in re.

Aut jam perfectus sim. Adhuc ait se de perfectione hac, et de tali resurrectione suspensum.

Sequor autem si quomodo comprehendam, in quo et comprehensus sum a Christo Jesu. Si comprehendam meritum apostolatus, in quo apostolatu a Christo sum reprehensus.

0849C Fratres, ego me non arbitror comprehendisse. Se humiliando, omnibus gloriam tollit, et universos provocat ad perfectionem.

Unum autem, quae quidem retro sunt obliviscens: ad ea vero quae sunt priora extendens meipsum. Hoc solum scio, quia quotidie proficio: et praeteritum laborem computans, ad priora festino: sive Legis obliviscens, ad perfecta Evangelii praecepta me teneo.

Ad destinatum persequor bravium supernae vocationis Dei in Christo Jesu. Quod perfectis Deus promisit in Christo in coelis: quod non nisi vincentes accipient.

Quicumque ergo perfecti sumus, hoc sentiamus. Quomodo negat se esse perfectum, si alii sunt: nisi humilitatis 0849D gratia hoc dictum accipias? Quicumque perfectus est, hoc sentiat: vetera scilicet obliviscendo, nova sectando. Quia perfecti debent esse discipuli Christi; licet superius de perfectione praemii: hic vero de scientia sit locutus.

Et si quid aliter sapitis, et hoc vobis revelabit Deus. Si quid alii Deus revelavit. Aliter, inquit, non aliud: hoc est, alia assertione, non fide.

Verumtamen ad quod pervenimus. Ad perfectionem novi Testamenti.

0850A Ut idem sapiamus. Idem sit: aliter scilicet alter non astruat.

Et in eadem permaneamus regula. Non enim scire sufficit sine facto.

Imitatores mei estote, fratres. Me sequimini, non falsos apostolos.

Et observate eos quia ita ambulant, sicut habetis formam nostram. Dupliciter dicitur observare, vel ad imitandum, ut hic: vel ad cavendum, sicut ad Romanos ait: Observate eos qui dissensiones et offendicula faciunt.

Multi enim ambulant, quos saepe dicebam vobis. De his dicit, qui spem passionis Christi, per quam peccata dimissa sunt, auferentes, in lege caeremonias collocabant. Potest et de Joviniani studiis accipi, 0850B qui jejuniorum afflictiones et omnem corporis cruciatum, in luxuriam et epulas converterit.

Nunc autem et flens dico, inimicos crucis Christi. Notandum quod vero affectu, omnium salutem optaverit, qui etiam inimicos crucis Christi deflebat, ultro in interitum properantes.

Quorum finis interitus. Quia in corruptione seminant carnis.

Quorum Deus venter est. Qui se in hoc putant Deo servire, si comedant, non audientes Prophetam dicentem: Si manducaveritis et biberitis, nonne vos manducatis et bibitis?

Et gloria in confusione ipsorum, qui terrena sapiunt. In circumcisione verecundi membri.

Nostra autem conversatio in coelis est. Hoc non potest 0850C dicere terrenis vitiis mancipatus.

Unde etiam Salvatorem exspectamus, Dominum nostrum Jesum Christum. Qui caput est nostrum.

Qui reformabit corpus humilitatis nostrae, configuratum corpori claritatis suae. Sicut monstravit in monte, cum unum ex viventibus, et unum ex mortuis, claritatis suae corpori configurat: exemplum resurrectionis ostendens, et in mortuis, et in viventibus.

Secundum operationem virtutis suae: qua etiam possit subjicere sibi omnia. Quia non solum conformavit nos, sed etiam corpori suo omnia fecit esse subjecta, sive secundum sententiam, qua sibi cuncta subjecit, etiam hoc illi possibile est.