4b. In Nativitate Domini.

1. Ecce, iam venit nostra
redemptio pretiosa.

2 a. Gaudeamus
in unum
cum angelica agmina.

2 b. Caeli regem
in terris
arta tenent cunabula.

3 a. Humanamque carnem
assumens
tulit membra servilia,

3 b. Qui simul patravit
cum patre
totius mundi machinam,

4 a. In praesaepio
iacet, angeli
pastoribus [hunc] praedicant ;

4b. Lactat Maria
Dominum, magi
eius cognoscunt sidera.

5 a. Te petimus supplices
voce nunc humillima,
Ut impetres veniam
nobis hic mortalibus
a Christo,
virgo sanctissima ;

5 b. Ipse natus est ex te,
qui sine initio,
Deus ineffabilis
in nulla concluditur
prisca vel
ultima tempora.

6 a. O mira Domini
et gratuita,
quae nobis dedit, remedia !

6 b. Filium unicum
misit, ut servos
revocaret ad caelestia

7 a. Hostem antiquumque
condemnaret,

qui protervam contra eum
erexerat
inanem quoque superbiam,

7 b. Portam(que) mortiferam,
quam replerat
ex electis, forti manu
diriperet
atque reduceret spolia.

8. Tuam, Christe, recolentes

nativitatem suppliciter deposcimus,

9 a. Aeterna

nobis des praemia,

quibus sit pura

mens ac sincera pectora ;

9 b. Da digne

nobis frequentare

natalitia

tua, o Iesu redemptor.