298. In Translatione s. Servatii.

1 a. Dulce melos iubilemus,
Cor et vocem concordemus
In laude Servatii ;

1b. Clangat chorus in psallendo
Dans et laudes recolendo
Praesulis eximii.

2 a. Hic a cunis educatus,
Soli Christo consecratus
Miro satis foedere,

2 b. Omni fere nam sugebat
Die semel et bibebat
Lac de matris ubere.

3 a. Hinc sacerdos fit virtutis,
Plenus summae servitutis,
Post haec eucharistiae

3 b. Solo gustu refovebat

Corpus, sed mens spe vivebat
Aeternalis gloriae.

4 a. O quam felix, quam beatus,
Qui de caelo confortatus
Angelico famine

4b. Iam sub aevo decessore
Insignitur hoc ductore
Praesulatus culmine.

5 a. Sanant aegros et languentes
Eius lotis defluentes
Manibus reliquiae,

5b. Dat infirmis firmitatem
Et insanis sanitatem
Tactus vestis fimbriae.

6 a. Fractus lapis solidatur,
Et effracta comprobatur
Haeresis perfidiae.

6 b. Hunc in somno visitavit
Rex caelorum, quem donavit
Petrus clavi gratiae.

7 a. O Servati gloriose,
Christi miles pretiose,
Confessor egregie,

7 b. Nos precare supernorum
Iungi choro peccatorum
Mundos a pernicie,

8 a. Ubi modo gloriaris
Et divina satiaris
Intuens mysteria;

8 b. Nos in bonis demorari
Et ipsius imitari

Da, Christe, vestigia.