194. De sancto Francisco.

1 a. Salve, pater, forma morum,
Praecolende dux Minorum,
Duc ad regna nos polorum
Tuis sacratis precibus.

1b. Salve, pater, institutor
Novae prolis atque tutor
Miserorum et adiutor
Devotarum plebium.

2 a. Salve, noster patriarcha,
Qui salvasti hos in arca,
Cuncta mala nostra calca
Tuis praeclaris meritis.

2 b. Lingua nempe laudatoris,
Peritissimi doctoris
Nec metam tui fervoris
Collaudare sufficit.

3 a. Nudus nudum es secutus
Christum, gaudens valdetutus,
Post eum pergis non indutus
Mundi huius opibus.

8 b. Quibus omnibus despectis,
Calciamentis abiectis,
Veste rudi, chorda electis
Crucifixum sequeris.

4 a. Paupertatem desponsasti
Et prae cunctis eam amasti,
Nunquam fuit regina Vasthi
Tali honore praedita.

4b. A criminibus remotum,
Divinali igne fotum
Apostolicumque totum
Te vocavit Dominus.

5 a. Proles gignis te sequentes,
Totum orbem adimplentes,
Christi gestis adhaerentes,
Ut exemplis panditur.

5 b. Corpus tuum, saepe lassum,
Post magistrum cruce passum,
Tendit cursum non incassum
Sequens sua vestigia.

6 a. In Alverni monte degens,
Crucem Domini perlegens
Et gemitibus te regens
Meruisti stigmata.

6 b. Qui patibulo pependit,
Ex Olympo mox descendit
Mane quodam et ostendit
Tibi amorem maximum,

7 a. Crucifixus et alatus,

Ut Seraph pennis velatus,
Statim tecum amplexatus
Vultu amoeno et hilari.

7 b. Disparente visione
Eiusque locutione
Statim ab impressione
Cicatricum laederis.

8 a. In te plagae remanentes,
Manus pedesque affligentes
Sicut latus, ut videntes
Verbo certo praedicant.

8 b. Sed de clavis mire factis,
Nervo duro iam peractis,
Parum desuper extractis
Idem testes asserunt,

9 a. Tu es ergo caelo missus,
Sine cruce crucifixus,
In quo signo iam abyssus
Secretorum panditur.

9 b. Nunquam hoc fuit auditum,
Sacramentum tale scitum,
Hoc que donum infinitum
Praestat cunctis gaudium.

10 a. Pater igitur Francisce,
Qui lactaris recepisse
Christi plagas, fac, ut ipsae
Prosint nobis omnibus,

10 b. Ut a culpis eruamur
Meritisque induamur
Ac in caelis perfruamur
Sempiternis opibus.