56. In Visitatione BMV.

1 a. Lauda, Sion, salvatorem,
Qui salutis praecursorem
Consecravit hodie ;

1 b. Lauda matrem singularem,
Quae fert fructum salutarem
Dans thema melodiae.

2 a. Laudis thema specialis,
Vox salutis virginalis
Grandis efficaciae,

2 b. Quam dum sentit nondum natus
Infans, gestit Deo gratus
Nomen habens gratiae.

8 a. Hinc exclamat voce clara
Mater cana, Deo cara,
Cognata christiferae,

3b. Laudempromitvirginisinclitae,
Fetum prodit fertilis hospitae,
Clamor praeconiferae.

4 a. Hac in die porta patet,
In qua princeps regum latet,
Aulae flos virgineae.

4 b. Regem portat vernula divitem,
Qui confortat munere militem,
Stirpis consanguineae.

5 a. Haec est dies veneranda,
In qua claret admiranda
Regis incarnatio ;

5b. Rubum cernit inflammatum
Nec virore depraedatum
Mira foederatio.

6 a. Est inventa baiulare

Dulcem fructum sine pare
Florens Levi virgula,

6 b. Quem dat ope pressionis
Rorem vellus Gedeonis,
Ventris condit conchula.

7 a. Agnus Dei est emissus
Ad montem tuae promissus
Visitator filiae;

7 b. De radice scandit Iesse
Virgae decor hinc egressae,
Plenae flos munditiae.

8 a. Sponsa regis accumbentis
Nares nardi redolentis
Demulcet odoribus,

8b. Gnara sponsi venientis
Audit vocem salientis
Trans colles in montibus.

9 a. In montana festinanter
Abit, subit festivanter
Vatis domicilium ;

9 b. Visitat se seniorem,
Salutat maior minorem
Velox ad officium.

10 a. Dulcis piae vox Mariae,

Vox salutis, vox virtutis

Tangit aures, viscera.

10 b. Vox cognatae visitatae,
Vox sonora, vox decora,
Dei mirans munera.

11 a. En, prophetes nova fatur,
Quem virum circumplexatur,
In antiqua praesignatur
Nova tympanistria.

11b. En, levites prosperatur,

Trimestri cum quo moratur
Arca Dei, comitatur
Totam domum copia.

12 a. Ecce, mater, cuius venter
Est beatus eminenter,
Cuius fructus permanenter
Datur merces filiis ;

12 b. Hic est ager spiramenti,
Hic urna delectamenti,
Hic acervus est frumenti,
Qui vallatur liliis.

13 a. Pia mater, quae cognatae
Profecisti gravidatae,
Da nos morum gravitate
Gratos, pios ordinatae
Fidei sub regula.

13 b. Fac nos, auctor pietatis,
Milites humilitatis
Hic mereri cum beatis
Fructu tuae bonitatis
Refici per saecula.