92. De Beata Maria V.

la. Sponsa Dei, virgo mitis,
Lignum vitae irretitis
Peccatorum nexibus,

1b. Dare nobis hoc dignare,
Quod possimus te laudare
Totis pure sensibus.

2 a. Indignatur lex naturae
Tibi factam pariturae
Fidem impossibilium.

2 b. Sacrae voci sic intendis,
Quod omnino non attendis
Legem naturalium.

3 a. Te salutat, quem ignoras,
Fidem facit, et imploras,
Ut sic fiant omnia.

3 b. Fecundans salutata,
Nullo metu praegravata
Vel dolore saucia.

4 a. Virgo carne, virgo mente,
Virgo mater es repente,
Virgo paris filium.

4 b. Nulla talis genitura,
Qua creator fit factura,
Altum hoc consilium.

5 a. Perhorrescit hoc natura,
Quod tu, virgo, paritura
Solo verbo concipis.

5 b. Stupet, tremit, admiratur,
Quod hic nihil sibi datur,
Cum tu verbum suscipis.

6 a. Nescit modum, nescit causam,
Nescit illum, qui te clausam
Intrat et egreditur.

6 b. Signa fontem, hortum claude,
Dignus tamen omni laude
Ex te fructus editur.

7 a. Semper clausa manet porta,
Tamen ex te proles orta,
Cuius stat imperium.

7 b. Ferens fructum virga floret;
Tui fructus quis ignoret
Hoc esse mysterium?

8 a. Ecce, mira virtus Dei,
Ecce, patens ordo rei
Velata mysterio.

8b. Caro vestit deitatem,
Unde trahit puritatem
Dignam tanto parvulo.

9 a. Casta caste castum paris,
Cuius morte liberaris
Et omnis condicio.

9 b. Mortem morte natus stravit
Et nos vitae reparavit
Felici commercio.

10 a. Illum parit ista mater,
Quem et Deum Deus pater
In se Deo genuit.

10b. Ipse factus est infectus,
Nam ut panno carne tectus
Deum non deseruit.

11a. Geminata iam natura
Est et factor et factura
Idem Dei filius.

11b. Una tantum hic persona
Naturarum duo bona
In se unit unicus.

12 a. Matrem ergo deprecamur,
Ut a morte retrahamur
Impetrata venia.

12 b. Placa, mater, iram nati,
Iuste sumus iam damnati,
Et est opus gratia.

13 a. Ex te sola spes salutis
Pressis iugo servitutis,
Mater, placa filium.

13 b. Da spem digne resurgendi
Et aeternum obtinendi
Tecum, virgo, praemium.