160. De sancto Carauno.

1 a. Christo laudes exsolvamus,

Dono cuius celebramus

Carauni sollemnia.

1b. Eius diem veneremur,
Nos beata qui fovemur
Ipsius praesentia.

2 a. Quod vox oris sonat foris,
Hoc affectus per effectus
Adprobet concordiam.

2b. Cum in terris sic laudatur,
Hanc in caelis delectatur
Audire melodiam.

3 a. Tuum lauda, plebs, patronum
Per patroni praesens donum

Spem habens ad reliqua.
Ne desperes, cum sis peccabilis.
Est hostia prope placabilis,

Hostia pacifica.

3 b. Qui pro nobis deprecatur,
Hic quiescit et laetatur

In caeli palatio.
Psallant omnes et dicanthodie.
Dicant: Ave, martyr egregie,

Nostra consolatio.

4 a. Cesset Doeg Idumaeus,
Super astra suum Deus
Athletam remunerat.

4 b. Ibi gustat in aeternum

Quod optarat, quod internum
Mens eius sitiverat.

5 a. Per ascensum martyr purpureum
Salomonis conscendit aureum
Ad reclinatorium,

5 b. Ubi carnis solutis nexibus
Veri sponsi iunctus amplexibus
Verum habet gaudium.

7 a. Senatorum

stirpe progenitus,
Literarum

studiis traditus
Ad supernum

dictamen spiritus
Evidenter floruit.

7 b. Germinavit

prius ut Ulium
Mundum spernens

et matrimonium,
Pro fratribus

nactus martyrium
Factus rosa rubuit.

8 a. Caecus videt et mutus loquitur,

Invocato daemon eicitur

Trinitatis nomine.

8 b. Imbecillis sana regreditur,
Et collisus auriga redditur
Sanitati pristinae.

9 a. Inimicus nil proficit,
Mortis potestas deficit,
Vita post mortem sufficit,
Vivit corpus exanime.

9b. Caput deportat proprium
Collaudans Dei filium,
Post mortem testimonium
Reddit salutis animae.

10 a. Laetare, Sion filia,
Lauda Dei magnalia,
Cuius novit potentia
Sic mortis iura frangere.

10 b. Caedit hostis et vincitur,
Vincit martyr et caeditur,
Decollatur nec moritur,
Vivit hic et in aethere.

11a. Ave, consors angelorum,
Martyr, decus aliorum,
Ave, par apostolis.

11b, Fac nos mundos a peccatis
Coheredes civitatis

Supernae, quam recolis.

12 a. Tu, qui morti succumbere
Voluisti pro fratribus,
Digneris intercedere
Pro tibi famulantibus,

12b. Ut in futuro saeculo
Possidentes duplicia
Sponsi fruamur osculo,
Vera Dei praesentia.