245. De sancto Marco.

la. Vox sonora nostri chori
Nostro sonet conditori,
Qui disponit omnia;

1b. Per quem hic evangelista
Marcus, praesul clarus vita,
Pugnat cum victoria.

2 a. Sacerdotum stirpe natus
Aaron post est oblatus
Petro in baptismate;

2b. A quo plene eruditus
Digne fuit insignitus
Sacro diademate.

3 a. Hic vir tantae dignitatis
Prae fervore caritatis
Scripsit evangelium,

3b. Quod a Petro adprobatum
Est ecclesiae donatum
Magnum in exenium.

4 a. Hinc ad Italos directus
Patriarcha est effectus
Magnae Aquilegiae;

4 b. Quam cum verbo docuisset,
Signis claris illustrasset,
Reliquit Hermagorae.

5 a. Inde Romam post reversus,
Iussu Petri mox conversus
Pergit Alexandriam.

5 b. Tanta fulget hic virtute,
Quod multorum cum salute
Fundavit ecclesiam.

6 a. O quam digne est laudandus
Vir excelsus, commendandus
Pio magisterio.

6 b. Nam quos verbis edocebat,
Studiose commendabat
Sacro monasterio.

7 a. Ab hoc patre sic exorti
Monachorum greges cuncti
Sunt in Alexandria,

7 b. Qui caelesti vita clari
Dono fulgent singulari
In caelesti curia.

8 a. Tandem pastor hic insignis.
Fervens vita, clarus signis,
Cum palma martyrii

8 b. Christo regi iam coniunctus
Serto nitet coronatus
Sempiterni gaudii.

9 a. Gaude, urbs Venetiarum,
Quaepatronum tam praeclarum
Possides cum gloria;

9 b. Clama laudans praeconia,
Ut per eius suffragia
Laeteris in patria.