253. De sancto Martino.

la. Martini psallere

Festo cum gaudio
Decet et canere
Nos, ut ab impio
Tyranno eruat.

1b. Psallamus hodie
Decoris vocibus,
Canamus propriae
Cum mentis precibus,
Ut ista adnuat.

2 a. Martinus pallium
Egeno tribuit,
Dans ei gaudium
Illum sustinuit
Cum suo pallio.

2 b. Hac veste voluit
Caeli rex indui,
Christus apparuit
Martino, perfrui
Dat vitae gaudio.

3 a. In somnis praevidet
Miles miraculum,
Et Deus providet
Martino populum
Regendum Turonum;

3 b. "Hac veste" Dominus
"Me" dicens "induit,
Cum catechuminus
Hanc nudo tribuit"
Dat somnum resonum.

4 a. Commendat omnium
Curam pontifici
Suarum ovium
Gregis dominici
Martino praesuli.

4 b. Vultu vir humilis

Ac mente supplici
Pastoris similis
Personae simplici
Fit rector populi.

5 a. Martini bonitas

Est sanctimonia,
Celatur nuditas
Cum veste media
Iam nudi pauperis.

5 b. Gaudere potuit

Nudus cum pallio ;
Martino profuit
Plus vitae gaudio
Frui cum superis.

6 a. Cuius humilitas

Nos agat humiles,
Carnis debilitas
Ne nostrae debiles
Ad se nos provocet.

6 b. Istius praesulis
Assit protectio
Subiectis populis,
Caelis oratio

Sua nos collocet.