229. De sancta Katharina.

1. In Domino gloriari
Claro decet exemplari
Katharina praevia.

2 a. Non a semet commendari
Deo teste sed probari
Salubris est gloria.

2 b. Regalibus natalibus
Orta fuit, in artibus
Abundans peritia.

3 a. Non sapuit sed timuit
Altum, non forma tumuit,
Re, sensu, prosapia.

3 b. Caelebs non ex imperio,
Sed ex Pauli consilio
Viri mansit nescia.

4 a. Dum cogeret catholicos
Ad errores fanaticos
Tyrannus Maxentius,

4 b. Facundae sermo virginis
Spiritu fortitudinis
Obsistit constantius.

5 a. Pronos Dei famulam
Dementare sedulam
Perplexis scrutiniis,

5 b. Domitos rethoricos
Cives fecit caelicos,
Adflatos incendiis.

6 a. Dum his lucrandis militat,
Dum, quae sunt Dei, cogitat
Sancta mente, corpore,

6 b. Caesam regina visitat,

Quam haec ad vitam excitat
Non claudendam tempore.

7 a. Hera credit ; qui sectantur
Heram, simul trucidantur
Gladii compendio.

7 b. Virginem post blanditias,
Minas, poenales furias
Colli plectit sectio.

8 a. Canta miram novitatem :
Propter meram castitatem
Lac fudit pro sanguine.

8b. Oleum, pax pestibus,
Rorat eius ossibus
In Sinai culmine.

9 a. Baiulis ubi angelis

Iam spiritu dato caelis
Arabicum verticem

9 b. Speciali sepultura

Meritorum de mensura
Magnum tenet indicem.

10 a. Per te, sancta, sit transitus
Contriti nobis spiritus,
Sit et stola gemina ;

10 b. Promissa tuis precibus
Da patriae supplicibus
Gaudia intermina.