155. De sancto Bonaventura.

1 a. In superna hierarchia
Iubilans cum prole dia
Christo simul ac Maria
Sanctisque perenniter.

1 b. Bonaventura beate,

Per te nobis sint paratae
Mansiones, quae tam gratae.
Caelestes finaliter.

2 a. Te pater praedestinavit,
Ab aevo natus vocavit,
Pneuma te iustificavit
Clementer in tempore.

2 b. Te Deus gratificavit,
Mire nunc magnificavit,
Tibi secum praeparavit
Claro sedem opere.

3 a. Vita simul ac doctrina
Tua clamant baee divina,
Quod ereptus a ruina
Exstas cuncti vitii.

3 b. Sanctis moribus ornatus,
Deo summo summe gratus.
A civibus honoratus
Sempiterni gaudii.

4 a. Te gravissime languentem
Matris ob precem ferventem
Sacer saluti gaudentem
Franciscus restituit.

4b. Capti doni non ingratus
Per te cursus exaratus
Vitae patris est sacratus,
Qua felix hic floruit.

5 a. Cinctus cordula Minorum
Gradiendo vias morum
Ad thesauros meritorum
Aspiras celeriter ;

5 b. Quos contemptu mundanorum,
Fuga saecli et honorum
Affectuque supernorum
Congeris viriliter.

6 a. Sacer o Bonaventura,
Tibi cor, corpus in cura
Ad colendum velut rura
Fructus ad propaginem.

6b. Pastor duxque sic Minorum
Ducis, pascis ferculorum
Verbi vitae plurimorum
Adponens dulcedinem.

7 a. Exstirpator serpentinae
Haeresis, fons disciplinae,
Vas caelestis medicinae,
Puritatis caelicae.

7 b. Stella clara lucens mundo
Christum, lignum vitae,mundo
Pectore fers ac iucundo,
O doctor seraphice.

8 a. O columna nimis fortis

Sponsae Christi et consortis,
Quae praevalet portis mortis
Vitae servans lineam.

8 b. O gemma sacerdotalis,
Dignus sponsae cardinalis,
Vitae post cursum a malis
Sublatus ad gloriam.

9 a. Sancte praesul, pie pater,
Celse doctor, care frater,
Per te nobis absit ater
Infernus horribilis.

9 b. Per te conscendamus caelos,
Evadamus orci delos,
Grloriae canamus melos
Incomprehensibilis.