266. De ss. Miehaele, Gabriele, Rapliaele.

1 a. Angelorum in conspectu
Puro psallat intellectu
Mens devota, sobria;

1b.Quorum vires, quorum esse
Plene novit et expresse
Dei sapientia.

2 a. Divae mentis hi sunt mentes,
Ei semper adhaerentes
Caritate nimia.

2 b. Mente mens est prosequenda,
Nec sunt tamen subtrahenda
Laudum linguae munia.

3 a. Ut auctori sit devotum
Toto nisu plasma totum,
Perpes est iustitia.

3 b. Laudet ergo totus homo
Caeli regem et in domo
Militantes regia.

4 a. Quorum virtus, quorum decor
Plus me fugit, dum plus sequor
Eorum vestigia.

4b. Post hos currens me fatigo
Et, dum eos investigo,
Quaedam intro retia.

5 a. Quiddam tamen apprehendo,
Quod descendens, dum ascendo,
Capio sublimia,

5b.Etdumquaero quod est minus,

Mous magis capit sinus

De maioris gloria.

6 a. Nam subtilis haec et pura
Creatoris creatura
Quaedam est notitia;

6 b. Honor vigens in creatis

Pandit, cuius potestatis

Sit rex creans omnia

7 a. Quantus debet ille credi,
Cuius pes ne possit laedi,
Cavet haec familia,

7 b. Quae transsendit in decore,
In vi mentis et fulgore
Cuncta visibilia.

8 a. Illis iure laus debetur,
Quorum Deus nos tuetur
Vigili custodia,

8 b. Ne nos laedant, quantum volunt,
Qui de caelo pulsi colunt
Loca mundi varia:

9 a. Qui virtute Michaelis
Effugati sunt de caelis,
Dei tamen gratia.

9 b. Hic est princeps summi coetus,
Sub quo ruit inquietus
Draco fovens vitia.

10 a. Insistamus eius laudi,
Ut ereptis hostis fraudi
Poli pandat atria.

10 b. Veneremur Deo carum
Conductorem animarum
Ad caeli palatia.

11 a. Sit laus iugis Gabrieli,
Cui sua rector caeli
Credidit mysteria;

11b. Hic est Dei fortitudo,
Quem superna celsitudo
Destinat ad fortia.

12 a. Iste missus ad Mariam
Ad salutis nobis viam
Posuit initia:

12b. Dum per eum salutata
Fit ex Deo gravidata
Patris parens filia.

13 a. Qui tam potens es et fortis,
A funestae nos cohortis
Protege versutia,

13 b. Et, quam blande salutasti,
Matrem castam agni casti
Nobis reconcilia,

14 a. Ut haec per te suadentem
Apud natum et parentem
Nobis sit propitia,

14b. Quo solutos a peccatis
Nos conducat cum beatis
Ad aeterna gaudia.

15 a. Raphaelem venerari
Ratione docent pari
Patrum testimonia ;

15 b. Qui fidelis comes viae
Deputatus est Tobiae
Trina dans remedia:

16 a. Curat caecum, docet viam,
Saram servat et Tobiam
Sanos per fumigia.

16 b. Ipse nobis sit tutela,
Peregrinis lux, medela,
Socius in patria.

17 a. Quam illustrat et decorat
Iesus Christus, quem adorat
Caelum, tellus, maria;

17 b. Cui mille beatorum

Voces canunt angelorum
Et centena milia.