13. In Transfiguratione Domini.

1 a. Verus sol divinitus
Carnis nube conditus
Demonstratur hodie:

Ib. Nam in monte residens
Christus totus renitens
Lumen fudit gloriae.

2 a. Ibi Moses mittitur,
Et Elias cernitur
Sacro fans eloquio.

2 b. Nubes clara cogitur,
Christus luce funditur
Albo facto pallio.

3 a. Vox a patre labitur,
Laus filio redditur
Coram consistentibus.

3 b. Tam grandis spectaculi
Testes tres discipuli
Sunt cunctis fidelibus.

4 a. Non vacat mysterio
Tanto cum imperio
Gloria demonstrata:

4 b. Nam est in mortalibus,
Domino fidelibus,
Gloria figurata.

5 a. Omnis dotis opera
Carnis tenens viscera
Christus hic exercuit.

5 b. Hodie discipulis
Christus peramabilis
Claritate micuit.

6 a. Ex utero prodiens
Subtilitate nitens
Fidelibus apparet ;

6 b. Dum per aquas graditur,
Levitate ducitur

Et agilis non haeret.

7 a. Ergo, Iesu Domine,
Verum lumen animae,
Animam glorificas

7 b. Et, cum iudex veneris,
Dotes nostri corporis,
Rogamus, amplifica.