14. In Transfiguratione Domini.

1 a. Splendor patris et figura
Se transformans hodie
Nostrae carnis in natura
Signa pandit gloriae.

1 b. Tres assumens secum testes
Scandit montis culmina ;
Splendet vultus, albent vestes,
Luce nitet gemina.

2 a. Splendor autem faciei
Ut solaris luminis
Niveaeque speciei
Candor erat tegminis.

2 b. Adest ibi legislator
Moyses mitissimus
Et futurus debellator
Elias fortissimus.

3 a. O res magna, factor magnus
Facturus magnalia !
Oves ducit mitis agnus
Montis ad sublimia.

3 b. Hoc sunt quippe monte digni,
Hunc ascendunt verticem,
Qui triumpho cum insigni
Caeli tenent apicem.

4 a. Vult prophetas tunc adesse
Divina provisio,
Ut probetur tam expresse
Nostra resurrectio.

4 b. Alter erat cum defunctis,
Moyses supererat,
Ut cunctorum rex ex cunctis
Rei testes proferat.