20. De quinque Vulneribus DN.

1 a. Cenam, Christe, celebrasti,
Mortem tuam nuntiasti,
Quando pascha manducasti ;

Ib. Sceleris autorem tanti
Iudam ofella monstrasti;
Olivetum hinc intrasti.

2 a. Tunc procidens humi stratus
Patrem supplex es precatus,
Ut transiret calix durus.

2 b. Iudas illum sciens locum,
Turbam ducens pontificum
Osculo tradidit Christum.

3 a. Tunc ministri irruerunt,
Capto manus ligaverunt,
Mite caput percusserunt.

3 b. Christum spinis coronarunt
Purpuraque vestierunt,
Sic pro rege deriserunt.

4 a. Liberare iudex volens,

Ipsum tamen vulgus timens,
Condemnavit manus lavans.

4b. Christus crucem baiulavit,
Iussus Simon hunc adiuvit,
Turba sequens multa flevit.

5 a. Sanctum corpus prostraverunt,
Pedes et manus foderunt,
Crucifixum erexerunt,

5 b. Inter fures statuerunt ;
Scriptum superposuerunt,
Quod gentes cunctae legerunt.

6 a. Carnifices mox duorum
Crura frangentes latronum
Christum vident iam necatum.

6 b. Quare miles hastam sumpsit,
Christi latus perforavit,
Quintum vulnus tunc patravit.

7 a. Per tua quinque vulnera
Deleas nostra, Christe, scelera,

7 b. Ut post dura mortis iura
Laetemur in caelesti patria.