21. De Sanguine Domini Nostri.

1. Gratuletur

2 a. Plebs fidelis iam in vero
Christi sanguine,
Per quem caeli
patuit aditus in
eius effusione.

2 b. Sanguis Abel effusus est
de terra clamans ;
Sanguis Christi
nil loquitur aliud
quam misericordiam.

3 a. In oblatione
Isaac et arietis
in immolatione
figurata est effusio.
Agnus legis mosaicae
agni Christi novae legis
typus et umbra fuit.

3 b. Illius sanguinis
aspersio Israelis
populum percussore
tantum liberavit angelo;
Huius vero Christi sanguis
assertor est libertatis
omnium credentium.

4 a. Sanguis legis et hircorum
fundebatur ad solam
carnis emundationem;

4 b. Sanguis Christi effusus est
ad nostram emundandam
[peccatis] conscientiam.

5 a. Ave, sanguis pretiose,
per quem Deus peccatores
revocat in gratiam.
Beati sunt ergo illi,
pui laverunt stolas suas
et dealbaverunt eas
in sanguine agni.

5 b. Hic est ille sanguis, cuius
in effusione Deus
sibi iam complacuit.
Christus Iesus est pontifex,
cuius sanguis effusus est
in redemptionem morte
sic intercedente.

6 a. Non habemus pontificem,
qui nostris non compati
possit infirmitatibus.

6 b. Itaque cum fiducia

ad eius gratiae thronum
celeriter accedamus,

7. Ut misericordiam suam

consequamur et in sanguine eius
inveniamus gratiam.