35. De sanctissima Trinitate.

1 a. Personarum trinitatem
Et naturae unitatem
In primo principio

Ib. Collaudemus et credamus
Et sincere diligamus
Pulso mentis vitio.

2 a. Pater verbum ab aeterno
Eructavit de interno
Cordis secretario ;

2 b. Verbum dixit coaequale,
Qualis pater, verbum tale,
Pater est in filio.

3 a. Duo quidem sunt coniuncti
Sed disiunctim, et disiuncti
Sed coniunctim ;
res est ineffabilis.

3 b. Ut personae distinguuntur,
In natura coniunguntur,
Cum sint unum;
res inenarrabilis.

4 a. Nasci quidem a parente
Non est idem cum gignente,
Sed diversa natio ;

4b. Et ex Deo natus Deus

Probat, quod sint unus Deus ;
Haec est vera ratio.

5 a. Conspirant duo tertium,
Non aliud sed alium,
Amorem suavissimum ;

5 b. Procedit sanctus spiritus
Ab utroque, paraclitus,
Flamen, pneuma dulcissi-
mum.

6 a. Naturalis identitas,
Personarum diversitas
In tribus ab ecclesia

6 b. Praedicatur et creditur,
Veneratur et colitur,
Nostra fides et gloria.

7 a. Ex ipso manant omnia,
Per ipsum fiunt omnia,
In ipso manent omnia ;

7 b. Ipsi decus et gloria,
Ipsi laus et potentia,
Dicant omnes: Alleluia.