53. In Desponsatione BMV.

1. Collaudemus cum canticis
Coniugium virginale,
Quod commercium carnale
Non pertulit,

2 a. Quia filium protulit,

Virgo mater vocat virum
Virginem per modum mirum
Consentiens.

2b. Uxor Ioseph concipiens
Carne sola, praeter thorum
Non solius sed amborum,
Non pluribus

3 a. Sed communi coniugibus
Lege matrimoniali
Vir datur uxori tali
Divinitus.

3 b. Columba missa caelitus

Supra virgam certum signum
Dedit Ioseph fore dignum
Prae ceteris

4 a. Coniugio mulieris,

Supra facultatem rerum

Pariturae Deum verum

Et hominem.

4 b. Virgo suscipit virginem
Sub foedere nuptiarum,
Qui traxerunt genus clarum
A regibus,

5 a. Uxor a sacerdotibus
Clara sacerdotem gignit,
Regem quoque, qui praesignit
Coniugium,

5 b. In quo se praebet filium
Omni procul a cubili
Sine semine virili
Progenitum

6 a. Et parentibus subditum ;

Creatorem creatura

Suscipit in sua cura

Fideliter.

6b. Deus paret humili[ter],
Uxor parit genitorem,
Vir suis alit rectorem
Laboribus.

7 a. Coniugatis pauperibus

Sed iustis boc dedit donum,
Ut haberet omne bonum
In unico

7 b. Omnibus iustis publico;
Quod circumcidens vocavit
Vir Iesum nec dubitavit
Accipere

8 a. Coniugem plenam onere,
Quod nomen dedit descriptum
Censum solvens ; in Aegyptum
Non distulit

8 b. Ire, quem furor compulit
Herodis, matrem et natum
Portans per Dei mandatum,
Post referens.

9 a. Quo adire non deserens
Audivit caeli cantores,
Magos vidit pastores
Cum gaudio

9 b. Dantes decus praesaepio,
In quo fuit reclinatus
Puer, mox in templo latus
Ad Dominum,

10 a. Parvo pretio virginum
Redemptus ; en, invenitur
Duodenus, custoditur
In pretium.

10 b. O felix matrimonium !
Nulla tale tulit aetas,
Quod supra naturae metas
Deducitur,

11a. Textrix pauperi subditar,-
Fabro praesidet regina,
Utrisque proles divina
Se subicit.

11b. Quos nunc in caelo reficit
Uxorem, matrem coronans,
Imperium orbis donans
Sublimiter ;

12. Alumno dat feliciter
Perfrui se cunctis horis,
Ubi Deum iunctis choris
Collaudemus cum canticis.