55. In Visitatione BMV.

1 a. Virgini christiferae
Toto corde libere
Serviat praepropere
Plebs devota ;

1b. Quae prae cunctis prospere
Huic vitae miserae
Splendidior sidere
Fulget tota.

2 a. Haec dum Ave suscepit
Et Fiat fari coepit,
Verbum patris concepit
In Nazareth.

2 b. Mox montana adiit
Et domum introiit
Zacbariae, petiit
Elisabeth.

3 a. Ast ubi gradum fixit,
Cognatae Salve dixit,
Infans in ventre gliscit
Exsultare ;

3 b. Miles regem praescivit,
Dum matrem erudivit,
Ex quo vocem audivit,
Exclamare:

4 a. "O virgo benedicta,
Cuius fructus est ita !
Unde mihi merita,
Ut venires ?"

4b. "Non me decet, domina,
Ut ancillae limina
Per tua solamina
Praevenires.

5 a. Sed, cum tanta diceris,
Humilis efficeris,
Quapropter cantaveris
Magnificat.

5 b. Nunc succurre miseris,
Nam, quos visitaveris,
Splendor tanti sideris
Laetificat.